फक्त सहा शब्दांत…

प्राची आंधळकर, कॉलेज क्लब रिपोर्टर

ट्विटरवर १४० शब्दांमध्ये म्हणणं मांडताना कसरत होते. मग चक्क सहा शब्दांत तुम्हाला कथा मांडायला सांगितली तर? हा ट्रेंड सध्या सोशल मीडियावर दिसून येतोय. काय आहे हा ट्रेंड, त्याविषयीच…
अवघ्या सहा शब्दांमध्ये तुमची कथा मांडा असं जर कुणी सांगितलं तर? ‘इम्पॉसिबल’ असं तुम्ही म्हणाल. पण कमीतकमी शब्दांत अशा प्रकारे कथा मांडण्याचं काम सध्या सोशल नेटवर्किंगवर सुरू आहे. फेसबुक, ट्विटरवर अशा सहा शब्दांमधल्या कथांची स्पर्धा सुरू झालीय. फक्त सहा शब्दांत त्या कथेचा सारांश मांडायचा असा याचा अर्थ. मराठी, हिंदी, इंग्रजी भाषांमध्ये अनेकजण उत्साहानं सहा शब्दांमध्ये आपली कथा मांडताना दिसतोय. काही म्हणी, सुविचार वापरून तर काही वेळा कॉमेडी करत आपली कथा मांडतोय. 'सैराट'च्या डायलॉग्जपासून 'उडता पंजाब'च्या वादग्रस्त मुद्द्यांपर्यंत खूप काही या सहा शब्दांमध्ये मांडलं जातंय. अमेरिकेचे प्रसिद्ध लेखक अर्नेस्ट हेमिंग्वे यांना त्यांच्या सहा लेखकांनी 'सिक्स वर्ड स्टोरी'चं चॅलेंज दिलं. त्यावेळी त्यांनी ''फॉर सेल:बेबी शूज, नेव्हर वॉर्न'' ही पहिली सहा शब्दांची कथा त्यांनी मांडली. एका वाक्यामध्ये सारांश मांडताना यातून सुविचार निर्माण होऊ लागले. त्यानंतर अनेक वर्ष त्यांची आठवण म्हणून 'सिक्स वर्ड स्टोरी' स्पर्धा घेण्यात येते. सध्या ट्विटर आणि फेसबुकवर त्यांची आठवण म्हणून हा ट्रेंड सुरू झालाय. कवितांच्या ओळी, थोरांचे बोल, सुविचार, म्हणी या निमित्तानं ट्रेंडमध्ये येत आहेत. एवढंच नाही तर या स्टोरीजच्या इमेजेससुद्धा बनवण्यात आल्या आहेत. सोशल नेटवर्किंग साइट्सवर सिक्स वर्ड स्टोरी पेजेस आणि ग्रूप्सही बनवण्यात आले आहेत. #sixwordstories हा हॅशटॅग ट्विटर आणि फेसबुकवर लोकप्रिय झाला आहे. २ जुलै रोजी हेमिंगवे यांचा स्मृतीदिन असल्याने त्यांच्या चाहत्यांनी आत्तापासूनच #sixwordstories हा हॅशटॅग ट्रेण्डिंग केलं असून तो खूपच व्हायरल झाला आहे. आपल्याकडेही लोक सहा शब्दांत व्यक्त होताना दिसू लागले आहेत.

सोशल नेटवर्किंगवर गाजणाऱ्या सहा शब्दांच्या स्टोरीज - * तुमचा चेहराच तुमच्या मनाचा आरसा असतो. * तो आला - तिने पाहिले - तो हरला * काल आलो आज राहिलो उद्या जाणार * पण लहानगी कथा, होती खूप्प मोठठी. * मंगल देशा, पवित्र देशा, महाराष्ट्र देशा! * आलीस तर आलीस नाहीतर गेली उडत * एक मिसळ आणि चार पाव एक्स्ट्रा....