ट्रोलला करा कंट्रोल!

खऱ्या आयुष्यापेक्षा सोशल मीडियावर रमणाऱ्या पिढीसाठी ट्रोलिंग हे काही नवं नाही. गमतीमध्ये सुरू झालेला हा प्रकार कधी-कधी फारच गंभीर रूप धारण करतो. यामुळे अनेकांची मनं दुखवली जातात तर काहींना नैराश्याला सामोरं जावं लागतं. अशा ट्रोलचा सामना करताना पाळायचे काही नियम

कधीच प्रतिउत्तरं देऊ नका
ट्रोल करणाऱ्यांची मानसिकताच मूळात समोरच्याला त्रास देण्याची असते. त्यामुळे तुमच्या प्रतिउत्तराने त्यांचं कधीच समाधान होणार नाही. उलट त्यांचे प्रश्न वाढतच जातील. त्यामुळे त्यांना प्रतिसाद देण्यात ऊर्जा खर्च करू नका.

आत्मपरीक्षण करा
ट्रोल झाल्यानंतर त्यामागची कारणं शोधा त्याची मीमांसा करा. डोक शांत ठेवून आत्मपरीक्षण केल्यास यातून बाहेर पडण्याचा नवा मार्ग तुम्हाला सापडू शकतो.

सोशल मीडियापासून लांब रहा
वेळ हे प्रत्येक गोष्टीवर औषध असतं, त्यामुळे ट्रोल झाल्यानंतर थोडे दिवस सोशल मीडियापासून लांब राहा. यामुळे अनेक समस्या टाळता येतात आणि मानसिक शांतता मिळते.

नैतिक आक्रोश टाळा
ट्रोल झाल्यामुळे अनेकांचा आत्मसन्मान दुखावू शकतो. यामुळे अनेकजण स्वतःला दोषी मानून निराशाग्रस्त होतात. अशा वेळी आपण काही चूक केली नाही असा विश्वास स्वतःवर ठेवणं गरजेचं आहे.

नव्याने सुरुवात करा
कोणत्याही एका वाईट गोष्टीमुळे आयुष्य संपत नसतं. आलेल्या वाईट अनुभवांतून शिका आणि स्वतःमध्ये चांगले बदल घडवून आणा. नवऊर्जेने आयुष्याची पुन्हा सुरुवात करा.

शब्दांकन- दीपाली सकपाळ, कॉलेज क्लब रिपोर्टर