facebook : फेसबुक डिलिट करा, व्हॉट्सअॅपच्या सहसंस्थापकाचं आवाहन

नवी दिल्ली: व्हॉट्सअॅपचे सहसंस्थापक ब्रायन अॅक्टन यांनी पुन्हा एकदा फेसबुक अकाऊंट डिलिट करण्याचं जगभरातील युजर्सना आवाहन केलं आहे. यापूर्वीही ब्रायन यांनी 'डिलिट फेसबुक' ही हॅशटॅग मोहीम राबवून फेसबुक डिलिट करण्याचं आवाहन केलं होतं.

अमेरिकेच्या स्टॅनफोर्ड युनिव्हर्सिटीत व्याख्यान देत असताना ब्रायन अॅक्टन यांनी हे आवाहन केलं आहे. ब्रायन यांनी फेसबुकच्या प्रॉफिट मॉडेलवरही टीका केली आहे. आम्ही फेसबुक वाढवलं. ते चुकीचं होतं. आम्ही त्यांचं प्रोडक्ट्सही विकत घेतलं. आम्ही त्यांच्या संकेतस्थळाला साइन केलं. मात्र आता फेसबुक अकाऊंट डिलिट करायला हवं, असं ब्रायन यांनी सांगितलं.

२०१४ मध्ये फेसबुकने १९ अब्ज डॉलरला व्हॉट्सअॅप विकत घेतले आहे. त्यानंतर २०१७ मध्ये ब्रायन यांनी व्हॉट्सअॅप कंपनीला रामराम केला होता. पण ते तीन वर्ष फेसबुकसोबत होते. व्हॉट्सअॅपच्या या दोन्ही संस्थापकांनी युजर्स डेटा फेसबुकसोबत शेअर करण्यास विरोध केला होता. मात्र आता फेसबुक क्रॉस प्लॅटफॉर्म बनविण्याची तयारी करत आहे. त्यासाठी व्हॉट्सअॅप, मेसेंजर आणि इन्स्टाग्रामचं विलिनिकरण करण्यात येणार आहे.