'जिओ ४जी' के संग... रिलायन्सचा बंपर धमाका

मटा ऑनलाइन वृत्त । मुंबई

पंतप्रधान नरेंद्र मोदी यांच्या 'डिजिटल इंडिया' या महत्त्वाकांक्षी प्रकल्पाला बळ देणारं पाऊल रिलायन्स उद्योग समूहानं उचललं आहे. रिलायन्सनं आज आपल्या 'जिओ ४-जी' नेटवर्क सेवेचा शुभारंभ केला. विशेष म्हणजे, या सेवेअंतर्गत पुढील चार महिने डेटा व कॉलिंग सेवा मोफत मिळणार आहे.

रिलायन्स उद्योग समूहाच्या वार्षिक सर्वसाधारण सभेत समूहाचे प्रमुख मुकेश अंबानी यांनी ही घोषणा केली. 'सध्याच्या युगात आपण डिजिटल झालो नाही तर आपलं अस्तित्व राहणार नाही. कनेक्टिव्हीटीची ही दरी भरून काढण्याचं काम 'जिओ ४-जी' करेल. ही नव्या डिजिटल युगाची सुरुवात आहे. १८ हजार शहरे व दोन लाख गावांमध्ये 'जिओ ४जी' सेवा उपलब्ध होणार असून ती भारताला डिजिटल रँकिंगमध्ये वरच्या स्थानी नेईल,' असा विश्वास अंबानी यांनी यावेळी व्यक्त केला.

'जिओ ४-जी' सेवा काय देणार?

> ५ सप्टेंबर ते ३१ डिसेंबरपर्यंत डेटा, अॅप्स व व्हॉइस कॉलिंग मोफत
> भारतात कुठेही रोमिंग शुल्क नाही.
> १ जीबी डेटासाठी फक्त ५० रुपये शुल्क.
> ग्राहकांसाठी वेगवेगळे १० डेटा स्कीम्स असतील.
> विद्यार्थ्यांना सवलत; २५ टक्के अधिक डेटा मिळेल.
> जगातील सर्वात मोठे ४ जी एलटीई नेटवर्क
> '४ जी'बरोबरच '५ जी' व '६ जी' तंत्रज्ञानही वापरता येईल.
> आधार कार्डधारकांना कोणत्याही कागदपत्रांशिवाय '४ जी' सीम कार्ड देणार
> अवघ्या २,९९९ रुपयांत '४ जी' स्मार्टफोन देणार
> जिओच्या ग्राहकांसाठी कधीही 'ब्लॅकआउट डे' नसेल.