‘नयप्पम’च्या मोर्चेबांधणीला वेग

गुगलतर्फे स्मार्टफोनसाठी विकसित करण्यात आलेल्या ‘अँड्रॉइड’ या ऑपरेटिंग सिस्टीमच्या व्हर्जनची नावे, अनेकांच्या उत्सुकतेचा भाग बनली आहेत. अँड्रॉइड व्हर्जनना ‘गुगल’ने मिठाईची नावे देण्याचा ट्रेंड जगभरात लोकप्रिय बनला आहे. सध्या कार्यरत असणाऱ्या ‘अँड्रॉइड’च्या व्हर्जनला ‘मार्शमेलो’ असे नाव देण्यात आले आहे. ‘मार्शमेलो’च्या पूर्वीच्या व्हर्जनच्या नावासाठी ‘लॉलिपॉप’ आणि भारतीय बनावटीच्या ‘लस्सी’ही नावे चर्चेत होती. लवकरच ‘अँड्रॉइड’चे पुढील व्हर्जन येण्याच्या तयारीत आहे. या व्हर्जनसाठी नावे सुचविण्याची मोहीम जगभर जोरात सुरू झाली आहे. या मोहिमेत केरळी पदार्थ असलेल्या ‘नयप्पम’ची चर्चा आहे. या पदार्थाला सोशल मीडियावरून मोठी लोकप्रियता लाभली आहे, त्याविषयी...

गुगलचे सीईओ सुंदर पिचाई यांनी ‘एन’या आद्याक्षरापासून सुरू होणाऱ्या अँड्रॉइडच्या आगामी व्हर्जनसाठी नावे सुचविण्याचे आवाहन केले आहे. गेल्या वर्षी पिचाई यांनी आयआयटी चेन्नई येथे व्याख्यान दिले होते. सूत्रांनी दिलेल्या माहितीनुसार पिचाई यांनी हे नाव भारतीय मिठाईच्या नावे ठेवण्याचे संकेत दिले आहेत. या पार्श्वभूमीवर देशातील केरळी बांधवांनी स्थानिक ‘नयप्पम’या मिठाईच्या नावासाठी विशेष मोहीम राबविण्यास सुरुवात केली आहे. सोशल मीडियावर या कॅम्पेनची जोरात चर्चा असून, त्याला चांगलीच लोकप्रियता मिळत आहे. एका अहवालानुसार केरळी बांधव मोठ्या प्रमाणावर सोशल मीडियावर कार्यरत आहेत. याची प्रचिती टेनिस स्टार मारिया शारापोवाने सचिन तेंडुलकरविषयी प्रतिक्रिया दिल्यानंतर आली होती. केरळी बांधवांनी मारिया शारापोवाच्या अधिकृत पेजवर हल्ला करून तिला चांगलेच जेरीस आणले होते.

तांदळाचे पीठ, गूळ, तूप आणि नारळापासून ‘नयप्पम’ची निर्मिती केली जाते. या पार्श्वभूमीवर ‘गुगल’ने अँड्रॉइडच्या अधिकृत वेबसाइटवर ‘नयप्पम’ची नावनोंदणीही केली आहे. यापूर्वी देशातील अँड्रॉइडप्रेमींनी अँड्रॉइडच्या व्हर्जनासाठी लॉलीपॉप आणि किटकॅटच्या स्पर्धेत लाडू, काजूकतली, लस्सी आदी नावेही सुचवली होती. केरळच्या पर्यटन विभागानेही ‘नयप्पम’ला पाठिंबा देण्यासाठी आपल्या अधिकृत ट्विटर खात्याच्या माध्यमातून आवाहन केले आहे.