व्हॉट्सअॅपचे 'हे' फीचर चुकूनही वापरू नका!

मटा ऑनलाइन वृत्त । मुंबई

कोट्यावधी युझर्सच्या मोबाईलमध्ये अढळ स्थान मिळवलेले इन्स्टंट मेसेंजिग अॅप अर्थात 'व्हॉट्सअॅप'ची नवनवी फीचर्स रोज लाँच होत असतात. मात्र त्यातील काही फीचर्स धोकादायकही ठरू शकतात. सध्या अशाच एका 'रंग बंदलणऱ्या' नव्या फीचरचा मेसेज अनेक युझर्सच्या स्क्रीन्सवर झळकत आहे. मात्र प्रत्यक्षात तो मेसेज एक स्पॅम असून अशा धोकादायक मेसेजवर क्लिक न करण्याची सूचना सर्वांना देण्यात येत आहे.

'व्हॉट्सअॅप कस्टमाइज करून आपल्या आवडत्या रंगात बदला' अशा आशयाचा मेसेज गेल्या काही दिवसांपासून फिरत आहे. पण ते अॅक्टिव्हेट करण्यासाठी युझर्सना तो मेसेज आधी १२ जणांना पाठवून कस्टम कलर फीचर व्हेरीफाइड करण्यास सांगितले जाते. मात्र कलर व्हॉट्सअॅप केवळ डेस्कटॉपद्वारे वापरता येऊ शकते, असे सांगत फीचर 'व्हेरीफाइड' झाल्यावर युझर्सना क्रोम वेब स्टोअरमधून 'ब्लॅकव्हॉट्स' इन्स्टॉल करण्याची आणखी एक सूचना देण्यात येते.' मात्र हा सर्व प्रकार म्हणजे केवळ स्पॅम असून त्या इन्स्टॉलेशन्समुळे युझर्सना व त्यांनी मेसेज फॉरवर्ड केलेल्या सर्वांनाच व्हायरसचा सामना करावा लागू शकतो. त्यामुळे कोणत्याही 'नव्या फीचरचा' मेसेज आल्यास त्याकडे सरळ दुर्लक्ष करणंच योग्य ठरेल.

यापूर्वीही व्हॉट्सअॅप युझर्सना असे स्पॅम मेसेजेस पाठवण्यात आले होते.