५ कोटी युजर्सनी डाउनलोड केले 'गाना' अॅप

मटा ऑनलाइन वृत्त। मुंबई

स्मार्टफोनधारकांमध्ये प्रसिद्ध असणाऱ्या ‘गाना’ अॅपने आणखी एक गगनभरारी घेतली आहे. या म्युझिक अॅपने तब्बल ५ कोटी डाउनलोडचा आकडा पार केला आहे. म्हणजेच तब्बल पाच कोटी स्मार्टफोनमध्ये मानाचे स्थान पटकावलं आहे. चार वर्षापूर्वी सुरू झालेल्या या म्युझिक अॅपला सुरुवातीपासून चांगला प्रतिसाद मिळत होता. आता तर हे अॅप अव्वल स्थानी विराजमान झाले आहे. संगीतप्रेमींसाठी ‘गाना’ अॅपवर विविध भाषेतील सुमारे १० कोटी गाणी उपलब्ध आहेत.

संगीतप्रेमी यु़जर्सना केंद्रस्थानी ठेवत ‘गाना’ने अॅपमध्ये नवनवीन बदल करत संगीताचा आनंद दिला आहे. अॅपमध्ये नवीन फिचर्स समाविष्ट करण्यात येत असल्यामुळे अॅप अधिक युजर्स फ्रेंडली आहे. इंटरनेटच्या २-जी वेगावरदेखील गाणी सुरू राहत असल्यामुळे गाणी ऐकण्यासाठी युजर्सना कोणताही अडथळा येत नाही. फेसबुक मॅसेंजर म्युझिक बॉट, स्थानिक संगीताला दिलेले प्राधान्य आदी वैशिष्ट्यांमुळे अॅपला पसंती मिळत आहे.

'गाना'चे सीओओ प्रशन अग्रवाल यांनी सांगितले की,''युजर्सकडून अॅपला मिळालेली पसंती आमच्यासाठी अभिमानाची गोष्ट आहे. भारतातील विविध भाषेतील, भागातील संगीतप्रेमींसाठी आणखी नावीन्यपुर्ण गोष्टी देण्याचा प्रयत्न आम्ही करणार आहोत. स्थानिक भाषेतील गाण्यांनादेखील आमचे प्राधान्य असणार असल्याचे अग्रवाल यांनी म्हटले.

३.५ कोटी युजर्सनी 'गाना' अॅपवर रजिस्ट्रेशन केले आहे. त्यातील ७५ टक्के युजर्स हे ३५ वर्षाखालील आहेत. तर, ८२ टक्के युजर्स हे मोबाइलवरुन गाणी ऐकण्यास प्राधान्य देतात. 'गाना' अॅप ९ प्रादेशिक भाषांसह स्थानिक बाजारपेठेवर लक्ष केंद्रीत असणार असून इंग्रजी लिहीता, वाचता न येणाऱ्या भारतीयांपर्यंत अॅप पोहचवण्याचा प्रयत्न करणार आहे.

अॅपला भरभरुन प्रतिसाद देणाऱ्या युजर्ससाठी खास स्पर्धा आयोजित केली आहे. 'गाना' अॅपचे जिंगल असलेले 'बस बजना चाहिए गाना' या हे गाणं गातानाचा व्हिडीओ पाठवायचा आहे. महिनाभर सुरू असलेल्या स्पर्धेत युजर्सना मोबाइल जिंकण्याची संधी मिळणार आहे.