अॅप करेल ‘क्लिनअप’

स्वाती भट, कॉलेज क्लब रिपोर्टर

शहरांमध्ये कित्येक ठिकाणी कचरा उचलला जात नाही अशी तक्रार केली जाते. यावर उपाय म्हणून पार्ल्यातल्या संघवी इंजिनीअरिंग कॉलेजच्या विद्यार्थ्यांनी ‘गार्बेज लोकेटर’ हे अॅप शोधून काढलं आहे.
जागोजागी साठणारे कचऱ्यांचे ढिग आणि त्याची साफसफाई हा प्रश्न सगळ्याच महानगरांसमोर आ वासून उभा आहे. शहरांमध्ये कित्येक ठिकाणी कचरा उचलला जात नाही अशी तक्रार केली जाते. यावर उपाय म्हणून पार्ल्यातल्या संघवी इंजिनीअरिंग कॉलेजच्या विद्यार्थ्यांनी ‘गार्बेज लोकेटर’ हे अॅप शोधून काढलं आहे. शंतनू उगेमुगे, हर्ष परमार, अनमोल शेठ, आदित्य भट्ट, अथर्व नाईक अशी या विद्यार्थ्यांची नावं आहेत. स्वच्छता मोहिमेत नागरिकांचा सहभाग वाढावा यासाठी महापालिकेला ‘गार्बेज लोकेटर’ अॅपची मदत होणार आहे. हे विद्यार्थी कम्प्युटर इंजिनीअरिंगच्या तिसऱ्या वर्षाचे विद्यार्थी आहेत. कॉलेज प्रोजेक्टसाठी 'स्वच्छ भारत अभियान' असा विषय त्यांना देण्यात आला होता. त्यातून त्यांनी 'गार्बेज लोकेटर'ची निर्मिती केली आहे. विलेपार्ले आणि आता अंधेरीच्या के-पश्चिम वॉर्डमध्ये या अॅपची ट्रायल घेण्यात आली. मुंबई महानगरपालिकेने विद्यार्थ्यांच्या या प्रयत्नांचं कौतुक केलं आहे. या पायलट प्रोजेक्टचा अभ्यास करून येत्या काळात संपूर्ण मुंबईत हे अॅप उपलब्ध करून देण्याचा महापालिकेचा विचार आहे. कसं काम करेल अॅप? ज्या ठिकाणी कचरा साठलेला दिसेल त्या ठिकाणाचा फोटो काढून नागरिकांनी या अॅपवर अपलोड करायचा आहे. हे अॅप गुगल मॅपच्या मदतीने त्या फोटोचे लोकेशन ट्रेस करेल. मुंबई महानगरपालिकेच्या अधिकाऱ्यांना त्याविषयी या अॅपमधून माहिती मिळेल. त्या वॉर्डचे स्वच्छता कर्मचारी लगेचच त्या ठिकाणी जाऊन कचरा उचलतील आणि क्लीन-अपनंतरचा फोटो अपलोड करतील. हे अॅप बनवताना या विद्यार्थ्यांनी महापालिकेच्या वरळीच्या सॉलिड वेस्ट मॅनेजमेंट टीमकडून माहिती मिळवली.