मोबाइलला मराठी टच

भारतात दुसऱ्या क्रमांकाची सर्वात लोकप्रिय ऑपरेटिंग सिस्टिम कुठली आहे माहितीय? याचं उत्तर आहे इंडस ओएस. अँड्रॉइडवरील ही पहिलीवहिली बहुभाषिक मोबाइल ऑपरेटिंग सिस्टिम आहे. प्रादेशिक भाषांमधून मोबाइल वापरायचा झाल्यास त्यात येणारे अडथळे दूर करण्यासाठी इंडस ओएस उपयुक्त ठरते. सध्या हे ओएस मराठीसह असामी, बंगाली, गुजराती, कानडी, मल्याळम, ऊडिया, पंजाबी, तामिळ, तेलगू आणि उर्दू अशा एकूण १२ प्रादेशिक भाषांमध्ये काम करतेय. सहा बड्या मोबाइल उत्पादक कंपन्यांशी त्यांनी भागीदारी केली असून, त्यांच्या मोबाइल फोनमध्ये ही सिस्टिम येते. राकेश देशमुख, आकाश डोंगरे, सुधीर बी या तीन तरुणांनी ती बनवली आहे.

त्यांच्या कंपनीनं केलेल्या पाहणीनुसार, आजही ९० टक्के भारतीय लोक इंग्रजी भाषेला त्यांची पहिली, दुसरी किंवा अगदी तिसरी भाषाही समजत नाहीत. देशाच्या एकूण लोकसंख्येपैकी एकूण ८० दशलक्ष लोक मराठीचा वापर करतात. त्यांच्यापर्यंत इंटरनेट आणि तंत्रज्ञान पोहोचवण्यासाठी त्यांनी ही सिस्टिम तयार केली. मुंबई आयआयटीचे विद्यार्थी असलेले राकेश देशमुख, आकाश डोंगरे, सुधीर बी. या तरुणांनी त्यासाठीच इंडस ओएसची स्थापना केली. प्रायोगिक तत्त्वावर त्यांनी गुजरातमधल्या सौराष्ट्रपासून याची सुरुवात केली.

'आज भारतात ३०० दशलक्ष स्मार्टफोन युजर्स आहेत. २०२०पर्यंत देशात साधारणतः ७३० दशलक्ष इंटरनेट युजर्स असतील. त्यामुळे एकमेव भारतीय ऑपरेटिंग सिस्टिम असल्यानं आम्ही थेट इतक्या दशलक्ष लोकांपर्यंत पोहोचतो' असं राकेश सांगतो. भविष्यात इंडसला आंतरराष्ट्रीय स्मार्टफोन ब्रँडससोबत भागीदारी करायची आहे.

इंडस ओएसची मराठी भाषेसंबंधी वैशिष्ट्यं :

- इंडस कीबोर्डमध्ये ३ लाख मराठी शब्दांचं भांडार आहे. फास्ट टाइप करण्यासाठी यात वर्ड प्रेडिक्शन आणि ऑटो करेक्ट यांसारख्या सुविधाही उपलब्ध आहेत.

- प्रेडिक्शन सुविधेद्वारे कि, की, कु, कू आदी यांसारखे स्वरही लिहिता येतात. तसंच इंडस स्वाइपमार्फत इंग्रजीतल्या मजकूराचं चटकन मराठी भाषांतर मिळतं.

- इंग्रजी येत असूनही मातृभाषेत संवाद साधण्याची इच्छा असणाऱ्यांसाठी हायब्रीड कीबोर्डची सुविधा आहे.

- जगात पहिल्यांदाच मराठी भाषेतलं टेक्स्ट टू स्पीच हे वैशिष्ट्य या ऑपरेटिंग सिस्टिममध्ये आहे. मेसेज करण्यापासून ते ईमेल पाठवण्यापर्यंत अनेक गोष्टींसाठी ते उपयुक्त ठरतं. भारत सरकारच्या इलेक्ट्रॉनिक्स आणि माहिती तंत्रज्ञान विभागा व आयआयटी, चेन्नई यांच्या संयुक्त विद्यमानं हे बनवण्यात आलंय.

मिळालेले पुरस्कार
- इकॉनॉमिक टाइम्स टेलिकॉम पुरस्कार
- सिलिकॉन व्हॅली टॉप स्टार्टअप पुरस्कार २०१६
- ड्रायव्हर्स ऑफ डिजिटल पुरस्कार : डिजिटल स्टार्टअप ऑफ द इयर