आता इन्स्टाग्रामवर लाइक्स काउंट दिसणार नाहीत

नवी दिल्लीः तरुणांमध्ये इन्स्टाग्राम सर्वाधिक लोकप्रिय आहे. अनेकजण आपला बराच वेळ इन्स्टाग्रामवर घालवतात. इन्स्टाग्रामचे फॉलोवर्स, लाइक्स याबाबत युजर्सना उत्सुकता असते. अनेकदा तर फोटोंना अधिक लाइक्स मिळवण्यासाठी तरुणाईमध्ये चढाओढ सुरू असते. या लाइक्स आणि कमेंटच्या चक्रव्यूहात अडकलेल्या युजर्ससाठी कंपनीनं एक महत्त्वाचा निर्णय घेतला आहे. इन्स्टाग्रामनं लाइक्स काउंट हटवण्याचा निर्णय घेतला आहे. पुढील आठवड्यात अमेरिकेत याची चाचणी घेण्यात येणार आहे. युजर्सवर त्यांच्या पोस्टला किती लाइक्स मिळाले आहेत याचा सतत एक दबाव असतो, तर त्यांच्या पोस्टवर कसे रिअॅक्शन येतील याच विचारात असतात. यासाठीच लाइक काउंट बंद करण्याचा निर्णय कंपनीनं घेतला असल्याचे इन्स्टाग्रामचे सीईओ अॅडम मोसरी यांनी एका कार्यक्रमात स्पष्ट केलं आहे.

सध्या काही देशांत या फिचरची टेस्ट घेत असून. ज्यात लाइक्स, कमेंट आणि रिअॅक्शन फेसबुकवर प्रायव्हेट करण्यात आल्या आहेत. इन्स्टाग्रामवर कोणतीही पोस्ट शेअर केल्यानंतर युजर्सवर एक प्रकारचा दबाव असता. मित्र, नातेवाईक किंवा मोठे सेलिब्रिटी यांच्या पोस्टना मिळणाऱ्या लाइक्ससोबत ते तुलना करतात. असं कंपनीनं म्हटलं आहे.

इन्स्टाग्राम युजर्सच्या पोस्टवरील लाइक्स हाइड करण्यासाठी कंपनी एका प्रोटोटाइप डिजाईनवर काम करतेय. सोशल मीडिया पोस्टवर मिळणाऱ्या लाइक्स एका ड्रग्सप्रमाणे काम करतात. लाइक्सची वाढती भुक नुकसान पोहचवू शकते. इन्स्टाग्रामचे प्रोटोटाइप डिजाइन युजर्सचे लाइक्स हाइड करणार आहेत. ज्या युजरनं पोस्ट शेअर केली आहे फक्त तोच लाइक्स पाहू शकणार आहे. अन्य युजर्सना त्याच्या पोस्टवरील लाइक्स पाहता येणार नाही.

कॅनेडा, इटली, जपान, ब्राझील, ऑस्ट्रेलिया आणि न्यूझीलँडमध्ये लाइक्स काउंट हाइड करण्याचा प्रयोग केला होता. तसंच, फेसबुकवर सुद्धा लाइक्स हाइड करण्याची चाचणी ऑस्ट्रेलियात करण्यात येत आहे.