मोटोच्या 'या' फोनची बॅटरी पाहून उडालच!

मटा ऑनलाइन वृत्त । मुंबई

व्हॉट्स अॅप, डाउनलोडिंग, गेम्स, वायफायमध्ये रंगलेल्या-दंगलेल्या मोबाइलप्रेमींना भुरळ पाडणारा नवाकोरा स्मार्टफोन आज बाजारात दाखल झाला आहे. मोटो ई-३ पॉवरच्या विक्रमी विक्रीनंतर लिनोव्हो-मोटोरोलानं त्याची पुढची आवृत्ती 'मोटो ई-४ प्लस' आणली आहे. या फोनची बॅटरी तब्बल ५००० मिलिअॅम्प अवर (mAH) क्षमतेची आहे आणि तो खिशालाही परवडणारा आहे.

बजेट फोन सेग्मेंटमध्ये ओपो, विव्हो या कंपन्या सॅमसंगला टक्कर देत असताना 'मोटो'नंही बाजारात चांगलाच जम बसवला आहे. गेल्या वर्षी मोटो ई-३ पॉवरवर ग्राहकांच्या उड्या पडल्या होत्या. २४ तासांत १ लाख हँडसेट विकल्याचा कंपनीचा दावा आहे. आता ई-४ प्लस त्यापेक्षाही 'पॉवरफुल्ल' असल्याचं त्यांचं म्हणणं आहे. ५००० mAH ची बॅटरी, रॅपिड चार्जिंग टेक्नॉलॉजी आणि फिंगर प्रिंट सेन्सर हा त्याचा 'यूएसपी' ठरणार आहे.

मोटो ई-४ प्लसची काही खास वैशिष्ट्यं

>> दोन सिम कार्डांशिवाय एसडी कार्डसाठी वेगळा स्लॉट
>> ५.५ इंची स्क्रीन, संपूर्ण एचडी डिस्प्ले
>> स्क्रीनच्या सुरक्षेसाठी जाड काचेचं कवच
>> स्नैपड्रैगन ४२७ ऑक्टा-कोर प्रोसेसर
>> २ जीबी रॅम, १६ जीबी स्टोरेज
>> १३ मेगापिक्सलचा रिअर, ५ मेगापिक्सलचा फ्रंट कॅमेरा, दोन्ही कॅमेऱ्यांना फ्लॅश
>> किंमतः ९,९९९ रुपये (फ्लिपकार्टवर उपलब्ध)