सिमकार्डसाठी आधार सक्तीचं!

मटा ऑनलाइन वृत्त । नवी दिल्ली

मोबाइलचं सिमकार्ड, ब्रॉडबँड तसेच लँडलाइन फोन कनेक्शन हवं असल्यास यापुढे आधार कार्ड सक्तीचं करण्यात आलं आहे. दूरसंचार नियामक प्राधिकरणाने (ट्राय) हा निर्णय घेतला असून त्याबाबत नियमावली जारी करण्यात आली आहे.

'ट्राय'च्या नव्या नियमावलीनुसार प्रत्येक सिमकार्डसाठी ई-केवायसी प्रक्रिया आवश्यक असणार आहे. त्यामुळे केवळ नव्याने वितरित केली जाणारी सिमकार्डच नव्हे तर ज्यांच्याकडे सध्या सिमकार्ड आहे त्यांनाही ई-केवायसी व्हेरिफिकेशन करावं लागणार आहे. ई-केवायसीमुळे तुमचा पत्ता बदलल्यास नव्या पत्त्याचा पुरावा द्यावा लागणार नाही. तुम्हाला एकाच पत्त्यावर देशभरात कुठेही सिमकार्ड मिळू शकेल. विशेष म्हणजे सिमकार्डच्या गैरवापराला नव्या नियमावलीमुळे पायबंद बसेल, असा दावाही ट्रायकडून केला जात आहे.

दरम्यान, एका वर्षात देशभरातील सर्व सिमकार्ड आधार कार्डाशी जोडण्यात येतील असे फेब्रुवारी महिन्यात 'ट्राय'ने सुप्रीम कोर्टात सांगितले होते. त्यानुसारच 'ट्राय'कडून हे पाऊल उचलण्यात आले आहे.