मुंबई : कधीकाळी मोबाइलच्या बाजारपेठेवर अधिराज्य गाजवणारी नोकिया कंपनी पुन्हा एकदा जोमाने स्पर्धेत उतरली आहे. बार्सिलोनामध्ये आयोजित करण्यात आलेल्या मोबाइल वर्ल्ड काँग्रेसमध्ये नोकियाने 'नोकिया ९ प्युअर व्ह्यू' हा नवा फोन लाँच केला आहे. या फोनमध्ये तब्बल पाच कॅमेरे आहेत. या फोनची किंमत ६९९ डॉलर म्हणजे जवळपास ५० हजार रुपये आहे.
'नोकिया ९ प्युअर व्ह्यू' या स्मार्टफोनची विक्री मार्च महिन्यापासून सुरू होणार आहे. सध्या काही मोजक्या ठिकाणी नोकियाने प्री-ऑर्डर घेणे सुरू केले आहे. हा स्मार्टफोन मिडनाइट ब्लू रंगात उपलब्ध असणार आहे. नोकिया ९ प्युअर व्ह्यू या स्मार्टफोनच्या मागे १२ मेगापिक्सलचे ५ कॅमेरे आहेत. या पाचपैकी दोन कॅमेरे कलर आहेत. तर, तीन कॅमेरे मोनोक्रोम आहे. त्यामुळे ब्लॅक अॅण्ड व्हाइट फोटो अधिक चांगल्या प्रकारे काढता येणार आहेत. सेल्फीसाठी फ्रंट कॅमेरा २० मेगापिक्सल आहे. या फोनची स्क्रीन ५.९९ इंच इतकी असून कॉर्निंग गोरिल्ला ग्लास ५ आहे.
'नोकिया ९ प्युअर व्ह्यू'मध्ये क्वॉलकॉम स्नॅपड्रॅगन ८४५ प्रोसेसर आहे. या स्मार्टफोनमध्ये ८ जीबी रॅम असून १२८ जीबी स्टोरेज आहे. बॅटरी क्षमता ३३२० एमएएच इतकी असून क्यूआय वायरलेस चार्जिंग आहे. त्याशिवाय फोनमध्ये फेशियल अनलॉक आणि फिंगरप्रिंट सेंसरदेखील आहे. या स्मार्टफोनमध्ये 'अॅण्ड्रॉइड ९.० पाइ आउट ऑफ द बॉक्स' ओएस आहे.