​४ जीच्या स्पीडमध्ये जिओ नंबर वनः TRAI

मटा ऑनलाइन वृत्त । नवी दिल्ली

४ जी डाउनलोडच्या स्पीडमध्ये रिलायन्स जिओनं एअरटेल, वोडाफोन आणि आयडियाला पछाडले आहे. ट्रायने सप्टेंबर महिन्यातील स्पीडचे आकडे प्रसिद्ध केले असून यात जिओनं बाजी मारली आहे. दुसरे स्थान वोडाफोनला तर तिसरे स्थान आयडियाला मिळाले आहे.

'मायस्पीड अॅप'च्या माहितीनुसार, रिलायन्स जिओची डाउनलोड स्पीड सरासरी १८.४३३ Mbps आहे. वोडाफोनची ८.९९९ Mbps तर आयडियाची ८.७४६ Mbpsची आहे. चौथ्या स्थानावर असलेल्या एअरटेलची ४ जी स्पीड ८.५५० Mbps होती. विशेष बाब म्हणजे सर्व कंपन्याची डाउनलोड स्पीड सरासरी तीन Mbps नं कमी झाली आहे.

४ जी अपलोड स्पीडमध्ये आयडिया ६.३०७ Mbps त्यापाठोपाठ वोडाफोन ५.७७६ Mbps आणि जिओची ४.१३४ Mbps सरासरी स्पीड राहिली आहे. एअरटेलला अपलोडमध्येही चौथे स्थान मिळाले आहे. गेल्या तीन महिन्यांची अपलोड स्पीड सरासरी ६.३ Mbps, ५.९ Mbps, ४.४Mbps आणि ४.३ Mbps होती. मायस्पीड अॅपला आणखी चांगलं बनवणार असल्याची माहिती 'ट्राय'ने दिली आहे.