रिलायन्सच्या जिओ पर्वाला आजपासून सुरुवात

मटा ऑनलाइन वृत्त । मुंबई

डाटा, कॉलिंग, एसएमएस... सबकुछ मोफत देण्याची घोषणा करत दूरसंचार जगतात उलथापालथ घडवून आणणाऱ्या रिलायन्सच्या 'जिओ ४ जी'च्या सेवेला आजपासून सुरुवात झाली. रिलायन्सबरोबरच '४ जी' तंत्रज्ञानाला सपोर्ट करणाऱ्या सर्वच स्मार्टफोन मोबाइलवर रिलायन्सची सेवा उपलब्ध होणार असल्यानं ग्राहकांना मोठा दिलासा मिळाला आहे.

> सुरुवातीला केवळ विशिष्ट मोबाइल कंपन्यांच्या नेटवर्कवर 'जिओ ४ जी'ची सेवा उपलब्ध होती. आता सॅमसंग, एलजी, आसूस, मायक्रोमॅक्स, एचटीसीसह सर्वच ४ जी मोबाइलवर ही सेवा उपलब्ध असेल.

> सध्या वापरात असलेला मोबाइल क्रमांक रिलायन्स जिओमध्ये रुपांतरित करू शकता येईल. मात्र, मोबाइल हॅण्डसेट ४-जी तंत्रज्ञानाला पूरक असला पाहिजे.

> जिओ सीम कार्ड रिलायन्सच्या २ लाख दुकानांमध्ये, रिलायन्स स्टोरवर उपलब्ध असणार आहेत.

> जिओचा ४ जी प्रीपेड प्लान १९ रुपयांपासून, तर पोस्टपेड प्लान १४९ रुपयांपासून सुरू होईल.

> येत्या सहा महिन्यांत रिलायन्स जिओ ऑनलाइन केवायसी प्रक्रिया सुरू करणार आहे. आधार कार्डची पडताळणी केल्यानंतर फक्त १५ मिनिटांत रिलायन्स जिओचे सीम कार्ड मिळेल.

> जिओच्या ग्राहकांना 'वेलकम ऑफर'चा फायदा मिळणार आहे. ३१ डिसेंबरपर्यंत जिओच्या ग्राहकांना अनलिमिटेड ४ जी डेटा मिळणार आहे. तर, १ जानेवारी २०१७ पासून डेटासाठी पैसे मोजावे लागणार आहेत.

> डेटाबरोबरच ग्राहकांना व्हॉइस कॉलही मोफत असणार आहे. तर रोमिंगसाठीदेखील कोणतेही शुल्क भरावे लागणार नाही.

> जिओ चॅट, माय जिओ, जिओ म्युझिक, जिओ मनीसारखे अॅपस् मोफत मिळणार आहेत.

> जिओ ५० रुपयांत '४ जी'चा १ जीबी डेटा देत आहे.