ट्विटर इंडियाकडून खास भेट, दिवाळी निमित्त स्पेशल इमोजी

दिवाळीनिमित्त नवनवीन गोष्टी बाजारात येत असतात. या सणाच्या निमित्तानं, उत्सवी भावना दर्शवणारे काही इमोजीही ट्विटरनं आणले आहेत. त्यामध्ये खास LightUpALife हा विशेष हॅशटॅग आणि इमोजी तयार केलाय. यामध्ये दीप तेवता ठेवण्यात आला आहे. तसेच यात विविध बदल करण्याची सूचनाही करण्यात आली आहे. २०२० हे वर्ष प्रत्येकासाठी आव्हानात्मक होतं. मात्र या कालावधीत लोक एकमेकांसोबत मोठ्या प्रमाणावर होते हे टि्वटरच्या माध्यमातून दिसून आलं. प्रत्येक गरजू व्यक्तीला मदत करण्यासाठी लोक पुढे येत होते. यामुळेच वर्षभर टि्वटरवरील संभाषणात आभार मानणारं संभाषण मोठ्या प्रमाणावर दिसून येत होतं.

सकारात्मक आणि अर्थपूर्ण संभाषणासाठी लोक टि्वटरच्या माध्यमातून समोर येत असल्याचं वारंवार दिसून येत असल्याचं टि्वटर इंडियाचे मॅनेजिंग डायरेक्टर मनीष महेश्वरी म्हणाले. या वर्षभरात लोकांमध्ये 'मी' ऐवजी 'आपण' ही भावना निर्माण झाल्याचे निरीक्षणही त्यांनी नोंदवलं. या दिवाळीत हा उत्सवाचा आनंद साजरा करण्यासाठी अनेक लोक एकत्र जमतील. यातील काही खबरदारीसह प्रत्यक्ष तर काही आभासी विश्वात एकत्र येतील. त्यांना आमचे हे इमोजी नक्कीच उपयुक्त ठरतील तसेच सकारात्मकता ठेवण्यासाठी #LightUpALife हा हॅशटॅगही उपयुक्त राहील, असा विश्वासही महेश्वरी यांनी व्यक्त केला.

भारतीय इमोजी

भारतीय युजर्स लक्षात ठेवून टि्वटरने २०१५पासून खास भारतीय घडामोडींवर आधारित सुमारे ३०० वेगवेगळे इमोजी तयार केलेत. यातील ६८ टक्के इमोजी हे भारतीय सण आणि विशेष दिनांचं औचित्य साधून तयार करण्यात आले आहेत. यातील सर्वात पहिला इमोजी हा 'मेक इन इंडिया'चा होता. तर २०१६मध्ये दिवाळीनिमित्त प्रथमच भारतीय भाषेत इमोजी तयार करण्यात आला होता. यानंतर २०१७मध्ये पावसाळ्यानिमित्त तयार केलेला इमोजी सर्वात लोकप्रिय झाला. तर भारतीय तरुणांमध्ये सामाजिक भान निर्माण करण्यासाठी 'पॉवर ऑफ १८' या इमोजीचा सर्वाधिक वापर झाला. तर 'डीडीएलजे' या चित्रपटाला २५ वर्षे पूर्ण झाल्यानिमित्त तयार करण्यात आलेला खास इमोजीही खूप ट्रेडिंग झाला होता. तर कोविड काळात लोकांना भूतकाळात रमवणारा 'बॅक टू ९०' हा इमोजीही लोकप्रिय ठरला.