अमेरिकेनं घेतला 'टिकटॉक'चा धसका; लष्करास वापरण्यास मनाई

नवी दिल्ली: अमेरिकेच्या लष्कराने 'टिकटॉक' या सोशल मीडिया अॅपचा धसका घेतला आहे. 'टिकटॉक'मुळे राष्ट्रीय सुरक्षेला धोका निर्माण होऊ शकतो, असं सांगत अमेरिकन लष्कराला टिकटॉक वापरण्यास बंदी घालण्यात आली आहे.

अमेरिकन लष्करानं टिकटॉकवर बंदी घातल्याचं वृत्त मिलिट्री डॉट कॉमवर प्रसिद्ध करण्यात आलं आहे. टिकटॉक अॅप हे सायबर धमकी सारखच आहे. हे अॅप गुप्तहेरासारखंही काम करू शकतं, असं अमेरिकन लष्कराचे प्रवक्ते लेफ्टनंट कर्नल रोबिन ओचोआ यांनी सांगितलं. गेल्या महिन्यात अमेरिकन नौदलाने त्यांच्या कर्मचाऱ्यांना देण्यात आलेलं टिकटॉक अॅप डिलिट केलं होतं. त्यानंतर संरक्षण विभागानेही लष्कराला टिकटॉकपासून सावध राहण्याचे आणि कोणतंही अॅप डाऊनलोड करताना सावधगिरी बाळगण्याचे आदेश दिले आहेत.

दरम्यान, अमेरिकेत मेड इन चायना असलेल्या या टिकटॉकचा तपास सुरू आहे. ऑक्टोबर महिन्यात काही नेत्यांनी या अॅपच्या सेक्युरिटीवर प्रश्नचिन्हं उपस्थित केलं होतं. त्यानंतर हा तपास सुरू करण्यात आला होता. मेड इन चायना असलेलं हे अॅप यूजर्सचा डाटा तर गोळा करत नाहीत ना? याबाबतची हा तपास सुरू आहे. भारतातही टिकटॉकवर आक्षेप घेण्यात आला होता. टिकटॉकमधील आक्षेपाहार्य मुद्द्यांवर त्यावर आक्षेप घेण्यात आला होता.

टिकटॉक फ्रेन्डला भेटण्यासाठी तिनं सोडलं घर

टिक-टॉक हे एक सोशल मीडिया अॅप्लिकेशन आहे. या अॅपच्या मदतीनं स्मार्टफोन युजर्स छोटे-छोटे व्हिडिओ बनवून शेअर करू शकतात. 'बाइट डान्स' नामक कंपनीनं २०१६ साली हे अॅप लाँच केलं आहे. या अॅपची लोकप्रियता झपाट्यानं वाढत असून ऑक्टोबर २०१८ मध्ये अमेरिकेत हे अॅप सर्वाधिक डाउनलोड होणारं अॅप ठरलं आहे. सोशल मीडियावरील कोणतंही अॅप वापरणं धोकादायक असू शकतं. लहान मुलांनी मोठ्या माणसांच्या देखरेखीखालीच हे अॅप वापरायला हवं. टिक-टॉक अकाउंटसाठी तुम्ही साइन अप केल्यावर आपोआपच तुमची बरीच माहिती जगजाहीर होत असते. १३ वर्षांवरील व्यक्तीनेच टिक-टॉक अॅप वापरावं असं कंपनीचं सांगणं आहे. कॉमन सेन्स मीडियाच्या मते, टिक-टॉकवरील कंटेट पाहता १६ वर्षे व त्यावरील वयाच्या व्यक्तीनंच हे अॅप वापरणं योग्य आहे.

टिकटॉक अॅपवर बंदी घाला; मुंबई हायकोर्टात याचिका