Fact Check: 'त्या' व्हिडिओतील महिला अभिनंदनची पत्नी नाही?

सैनिकांच्या शौर्याचं राजकारण करू नका असा सल्ला भाजपला देणाऱ्या एका महिलेचा व्हिडिओ सध्या सोशल मीडियावर व्हायरल झाला आहे. ही महिला विंग कमांडर अभिनंदन याची पत्नी असल्याचंही बोललं जातं आहे. त्याचप्रमाणे या व्हिडिओच्या साहाय्याने राजकारण्यांवर भरपूर टीकाही केली जाते आहे.

काय आहे घटना?

काही दिवसांपासून एका महिलेचा व्हिडिओ व्हायरल झाला आहे. ही महिला स्वत:ला सैन्य दलातील ऑफिसरची पत्नी असल्याचं सांगते आहे. तसंच सैन्यातील सैनिकांच्या शौर्याचं, त्यागाचं, वीरमरणाचं राजकारण करू नका असंही ती सांगते आहे. ही महिला पाकिस्तानच्या तावडीत सापडलेला विंग कमांडर अभिनंदनची पत्नी आहे, अशा कॅप्शनसह तिचा व्हिडिओ व्हायरल झाला आहे.



काय आहे सत्य?

वास्तवात ही महिला अभिनंदनची पत्नी नाही. अभिनंदनच्या पत्नीचे नाव तन्वी मारवाह असून ती स्वत: एक निवृत्त एयरफोर्स पायलट आहे. 'तेलुगू समयम'ने तिच्याबद्दल एक बातमी छापली असून त्यातील तन्वीचा फोटो आणि या महिलेमध्ये भरपूर तफावत आहे. त्यामुळे ही महिला अभिनंदनची पत्नी नाही हे स्पष्ट होतं आहे.

निष्कर्ष:

सोशल मीडियावर व्हायरल झालेल्या या व्हिडिओतील महिला अभिनंदनची पत्नी नाही. मुळात ही महिला कुणा आर्मी ऑफिसरची पत्नी आहे की नाही, याबद्दलच साशंकता आहे.