हस्नेलने केले होते फेसबुक ब्लॉक

कासारवडवली हत्याकांड

म. टा. विशेष प्रतिनिधी, ठाणे

कुटंबातील १४ जणांची हत्या करून आत्महत्या करणाऱ्या हस्नेल वरेकर याच्या क्रूर मानसिकतेचे गूढ उकलण्यात अद्याप पोलिसांना यश आलेले नाही. मात्र, हस्नेलने आपले फेसबुक अकाऊंट ब्लॉक केल्याची माहिती तपासात पुढे आली असून ते अकाऊंट अनब्लॉक करून त्यातून तपासाला पूरक माहिती मिळेल का, याची चौकशीही आता सुरू झाली आहे.

हस्नेलनेच आपल्या कुटुंबीयांची हत्या केल्याचे त्याच्या बहिणीच्या जबानीवरून स्पष्ट झालेले आहे. त्यामुळे या हत्याकांडातील आरोपीला पकडण्याचे आव्हान पोलिसांसमोर नाही. एवढे मोठे हत्याकांड करण्यामागे हस्नेलची काय मानसिकता होती, हे शोधून काढण्याचे आव्हान पोलिसांसमोर आहे. अतिरिक्त पोलिस आयुक्त अशुतोष डुंबरे यांच्या नेतृत्वाखाली या प्रकरणाचा तपास करणाऱ्या पोलिस पथकांची बुधवारी एक बैठक झाली. त्यात मालमत्तेचा वाद, कौटुंबिक भांडण, कुठल्या विचारसरणीचा प्रभाव, भोंदू बाबा, कर्जबाजारीपणा, मनोरुग्ण अशा सर्वच आघाड्यांवर तपास करून ठोस पुरावे गोळा करण्याचे निर्देश देण्यात आले आहेत. हस्नेलने मार्च, २०१३ मध्येच नोकरी सोडून सुपारीचा व्यवसाय सुरू केला होता. त्यासाठी त्याने ३५ लाख रुपये उभे केले होते. त्यापैकी ७ लाख रुपये कोपरखैरणे येथील आपल्या बहिणीच्या पतीकडून घेतले होते. तर, सोने गहाण ठेवत ८७ हजार रुपये त्याने घेतल्याची माहिती हाती आली आहे. अन्य काही ठिकाणांहूनही कर्ज घेतले असण्याची शक्यता असून त्याचा तपास सुरू आहे. मात्र, एवढ्या कर्जासाठी तो निर्घृण हत्याकांड घडवेल, असे वाटत नसल्याचे पोलिसांचे म्हणणे आहे. अन्न आणि रक्ताच्या केमिकल अॅनलेसिसचा अहवाल गुरुवारी येण्याची शक्यता आहे. त्यातून हत्या पूर्वनियोजित होती की काही तत्कालीन कारण घडले यावर प्रकाश पडू शकेल.