'अरावली'त रामदेव बाबांना हजार एकर भूखंड?

टाइम्स न्यूज नेटवर्क । फरीदाबाद (हरयाणा)

फरीदाबादमधील अरावली पर्वतरांगांमध्ये वसलेल्या कोटा या गावात योगगुरू रामदेव बाबा यांच्या पतंजली संस्थेला तब्बल १ हजार एकरचा भूखंड मिळण्याचा मार्ग जवळपास मोकळा झाला असून या भूखंडावर भव्य असं विश्वविद्यालय अथवा आंतरराष्ट्रीय आरोग्य सुविधांनी युक्त संस्था उभारण्याची घोषणा 'पतंजली'कडून केली जाणार असल्याचे सूत्रांनी सांगितले.

रामदेव बाबा यांच्या प्रवक्त्यांकडे याबाबत विचारणा केली असता 'एवढी घाई कशाला? थोडीशी वाट बघा' असं सूचक उत्तर त्यांनी दिलं. रामदेव बाबा यांनी जानेवारी महिन्यातच ५ हजार कोटींची गुंतवणूक करून पतंजली भव्य अशी संस्था उभारणार असल्याचे सुतोवाच केले होते. हा प्रकल्प कोट गावातच होईल, असे आता स्पष्ट संकेत मिळू लागले आहेत. विशेष म्हणजे हरयाणा सरकारही त्यासाठी राजी असल्याचे सूत्रांचे म्हणणे आहे.

दरम्यान, अरावली पर्वतरांगांमध्ये वसलेल्या कोट आणि अन्य गावांमधील जमिनीची नोंदणी बंद करण्यात आली आहे. २०१२ मधील सुप्रीम कोर्टाच्या एका आदेशानुसार जिल्हा उपायुक्तांनी हा प्रतिबंधात्मक आदेश काढला होता. मात्र, त्यानंतरही २०१४-१५ या वर्षात जमिनीची मोठ्या प्रमाणात नोंदणी करण्यात आल्याचे समोर आले आहे. कोट गावातही २०१३ मध्ये मोठ्या प्रमाणात जमिनीची नोंदणी करून नंतर ती थांबवण्यात आली. दुसरीकडे राष्ट्रीय हरित लवादाकडे गेलेल्या एका प्रकरणात हरयाणा सरकारने २०१३ मध्ये कोट परिसरात जमिनीचे एकत्रिकरण थांबवण्यात आल्याचे स्पष्ट केले होते. त्यामुळे संभ्रमाचे वातावरण असून वनक्षेत्रात मोडणारी कोटमधील जमीन एखाद्या प्रकल्पासाठी बहाल केली जाऊ शकते का?, असा प्रश्नही उपस्थित झाला आहे.