टीव्हीचा रिमोट न दिल्याने बहिणीची आत्महत्या

नवी दिल्ली

टेलिव्हिजनचा रिमोट न दिल्याच्या भांडणातून बहिणीने आत्महत्या केल्याची धक्कादायक घटना दिल्लीत घडली आहे. भावाने टेलिव्हिजनचा रिमोट देण्यास नकार दिल्याने रागावलेल्या १२ वर्षीय बहिणीने स्वत:ला बेडरुमध्ये कोंडून घेतलं आणि गळफास घेऊन आत्महत्या केली आहे.

तीन भावंडांमध्ये सर्वात मोठ्या भावाने बेडरुमचा दरवाजा तोडून गळफास घेतलेल्या बहिणीला खाली उतरवून रुग्णालयात दाखल केलं होतं. गेल्या तीन दिवसांपासून तिच्यावर उपचार सुरू होते. मात्र रविवारी तिची प्रकृती आणखी खालावली आणि तिचा मृत्यू झाला.

दिल्लीच्या उत्तरपूर्व भागातील सीलमपूर येथे ही घटना घडली. चिमुकली बहिण आणि तिचे दोन भाऊ घरी एकटे होते. टीव्हीच्या रिमोटवरून बहिणीचं आपल्या ७ वर्षीय लहान भावासोबत भांडण सुरू झालं. त्यावेळी मोठा भाऊ (१७ वर्ष) त्याच्या खोलीत अभ्यास करत होता. आपला आवडता कार्यक्रम पाहण्यासाठी बहिणीने रिमोट मागितला, पण भावाने चॅनल बदलण्यास नकार दिला. यातून दोघांमध्ये कडाक्याचं भांडण झालं. मोठ्या भावाने हस्तक्षेप करत दोघांना शांत केलं. पण संतापलेल्या बहिणीने बेडरूममध्ये स्वत:ला कोंडून घेतलं. मोठ्या भावाने तिचा राग शांत करण्याचा प्रयत्न केला व दरवाजा उघडण्यासाठी आवाज देण्यास सुरूवात केली. पण आतून बहिणीचा आवाज येणं बंद झाल्यानंतर दरवाजा तोडून उघडण्यात आला. आत बहिणीने पंख्याला लटकून गळफास घेतला होता. तिला खाली उतरवून मोठ्या भावाने आई-वडिलांना फोन करून घटनेची माहिती दिली. बहिणीला तातडीनं रुग्णालयात दाखल करण्यात आलं. प्रकृती दिवसेंदिवस खालावत गेल्याने रविवारी तिचा मृत्यू झाला. पोलिसांनी या प्रकरणाची चौकशी सुरू केली आहे.