इंडिगो, गोएअरचे १३ तळीराम तीन महिन्यांसाठी निलंबित

नवी दिल्ली: इंडिगो, स्पाइस जेट आणि गोएअरच्या कर्मचाऱ्यांच्या करण्यात आलेल्या मद्यपान चाचणीत १३ कर्मचारी नापास झाल्याचे आढळून आले असून त्यांना तीन महिन्यांसाठी निलंबित करण्यात आले आहे.

१६ सप्टेंबर रोजी या कर्मचाऱ्यांची मद्यपान चाचणी घेण्यात आली होती. त्यात हे १३ कर्मचारी नापास झाल्याने त्यांच्यावर ही कारवाई करण्यात आल्याचे नागरी विमान वाहतूक संचालनालयाने स्पष्ट केले. कारवाई करण्यात आलेल्या कर्मचाऱ्यांमध्ये सात कर्मचारी इंडिगोचे असून प्रत्येकी एक कर्मचारी गोएअर आणि स्पाइस जेटचे आहेत.

या १३ कर्मचाऱ्यांची श्वास चाचणी घेण्यात आली होती. ती पॉझिटीव्ह आढळली. नोव्हेंबरमध्ये पुन्हा दुसरी चाचणी होणार आहे. आता यापुढे आम्ही विमान कर्मचाऱ्यांची नियमित चाचणी करणार आहोत. या चाचणीत दोषी आढळलेले बहुतेक कर्मचारी संवेदनशील विभागात कार्यरत असलेले आहेत, अशी माहिती डीजीसीएचे प्रमुख अरुण कुमार यांनी सांगितलं.

नागरी विमान वाहतूक संचालनालयाने सप्टेंबरमध्ये मद्यपान चाचणी करण्यात येणार असल्याचं स्पष्ट केले होते. त्यानुसार विमानतळ, एटीसी कर्मचारी, विमानांची निगराणी राखणारे कर्मचारी, विमान कंपन्यांना सांभाळणारे कर्मचारी आदी सर्वांची मद्य चाचणी करण्यात येणार आहे. यापूर्वीही २०१६मध्ये विमान कर्मचाऱ्यांच्या आधीच्या मद्यपान चाचणीचा अहवाल सादर करण्यात आला होता. त्यात त्या चार वर्षांत तब्बल ६५० हून अधिक वैमानिकांसह हवाईसेवक मद्यपान चाचणीत नापास झाल्याचे समोर आले आहे. त्यातही गेल्या चार वर्षांच्या तुलनेत २०१५ या वर्षांत हे प्रमाण वाढल्याचे पाहायला मिळत आहे.

नागरी विमान वाहतूक संचालनालयाच्या आकडेवारीनुसार मद्यपान चाचणीत २०१३ या वर्षांत एकूण १६६, २०१४ साली १४४ तर २०१५ साली सर्वाधिक म्हणजेच १८६ वैमानिक आणि हवाईसेवक अनुत्तीर्ण झाल्याचे समोर आले होते. त्यामुळे देशातील हवाई यात्रेची धुरा सांभाळणाऱ्या वैमानिकांची मद्यपान चाचणीतील नापास होण्याची वाढती आकडेवारी पाहता, प्रवाशांच्या सुरक्षेविषयी प्रश्नचिन्ह उपस्थित केले गेले होते.

वैमानिकांची थुंकीद्वारे ड्रगचाचणी शक्य

प्रयाण करण्यापूर्वी चाचणी का नाही?