माजी सचिवांना २ वर्षांची शिक्षा

नवी दिल्ली : मध्य प्रदेशातील कोळसा खाण एका खासगी कंपनीला वितरित करताना झालेल्या गैरव्यवहारांप्रकरणी विशेष सीबीआय न्यायालयाने माजी कोळसा सचिव एच. सी. गुप्ता यांच्यासह सेवेत असलेल्या अन्य दोन वरिष्ठ अधिकाऱ्यांना फसवणूक फौजदारी कट आणि भ्रष्टाचार या गुन्ह्यांसाठी दोन वर्षांच्या तुरुंगवासाची शिक्षा सुनावली आहे. यूपीए सरकारच्या काळातील गाजलेल्या कोळसा घोटाळ्याप्रकरणी शिक्षा झालेले हे पहिलेच सनदी अधिकारी आहेत.

कोळसा खात्याचे तत्कालीन संयुक्त सचिव के. एस. क्रोफा आणि तत्कालीन संचालक के. सी. समारिया हे शिक्षा झालेले अन्य दोन अधिकारी आहेत. या तिन्ही अधिकाऱ्यांना प्रत्येकी एक लाखांचा दंडही विशेष सीबीआय न्यायाधीश भरत पराशर यांनी ठोठावला आहे.