बिहारमध्ये निर्भयाची पुनरावृत्ती

मटा ऑनलाइन वृत्त । मोतिहारी (बिहार)

दिल्लीतील २०१२ मधील 'निर्भया'कांडासारखी थरकाप उडवणारी घटना बिहारमधील मोतिहारी जिल्ह्यात आज (गुरुवारी) उघडकीस आली आहे. आरोपींनी बंदुकीचा धाक दाखवून येथील २१ वर्षीय तरुणीवर सामूहिक बलात्कार केला. इतकंच नाही तर, त्यांनी बलात्कारानंतर पीडितेच्या गुप्तांगात पिस्तूल आणि लाकडी वस्तू घुसवल्या आणि तिला रस्त्याच्या कडेला फेकून दिले.

पीडितेला जवळील रुग्णालयात दाखल केले आहे. तिची प्रकृती गंभीर आहे. "आरोपींनी बलात्कार केला. त्यानंतर बेदम मारहाणही केली. काही वेळात आरोपींचे कुटुंबीय आले आणि त्यांनीही मला मारहाण केली.", असे पीडितेने जबाबात सांगितले. या प्रकरणी आरोपींवर कठोर कारवाई करण्यात यावी, अशी मागणी पीडितेच्या कुटुंबीयांनी केली आहे. आरोपींविरुद्ध तक्रार करूनही पोलिसांनी त्यांना अटक करण्यासाठी कोणतेही ठोस पाऊल उचलले नाही, असा आरोपही त्यांनी केला. दरम्यान, या प्रकरणातील आरोपी अद्याप फरारी आहेत.