गौरव गिलच्या कारची धडक; तिघांचा जागीच मृत्यू

नवी दिल्लीः अर्जुन पुरस्कार विजेता ड्रायवर गौरव गिलच्या कारचे आज राष्ट्रीय रॅली चॅम्पियनशीपच्या स्पर्धेत नियंत्रण सुटले. त्याची गाडी ट्रॅकवर चढल्याने एका मोटारसायकल बसलेल्या धडकेत एका चिमुरड्यासह तिघांचा मृत्यू झाला आहे. या अपघातात गौरव गिलही जखमी झाला आहे. नुकताच अर्जुन पुरस्कार देऊन त्याला सन्मानित करण्यात आले होते.

एफएमएससीआय इंडियन रॅली चॅम्पियनशीप २०१९ च्या तिसऱ्या टप्प्यात हा अपघात घडला. या अपघातात नरेंद्र, पुष्पा व त्यांचा छोटा मुलगा जितेंद्र या तिघांचा जागीच मृत्यू झाला आहे. हरियाणाचा एका कंपनीने या स्पर्धेचे आयोजन केले होते. रेसिंग ट्रॅकवर झालेल्या या दुर्घटनेनंतर ही रॅली रद्द करण्यात आली आहे. स्टेज एकमध्ये गौरव गिलची कार सर्वात पुढे होती. ती जवळपास १४५ ताशी किलोमीटर या वेगाने धावत होती. एका वळणावर आल्यानंतर ती एका मोटारसायकलला धडकली. गौरवने ब्रेक लावून रोखण्याचा प्रयत्न केला. परंतु, हा अपघात टाळता आला नाही, अशी माहिती आयएनआरसीचे प्रमोटर वाम्सी मेरला यांनी सांगितले.