जम्मू-काश्मीरमध्ये तीन अतिरेक्यांचा खात्मा

श्रीनगर: भारतीय सुरक्षा दलाने मंगळवारी कुपवाडा येथे चार अतिरेक्यांना ठार मारल्यानंतर आज पुन्हा तीन अतिरेक्यांना कंठस्नान घातले आहे. त्याचप्रमाणे कुपवाडामध्ये आणखी तीन अतिरेकी लपून बसल्याची शक्यता असल्याने लष्कराने सर्च ऑपरेशन सुरूच ठेवलं असल्याचं सूत्रांनी सांगितलं.

कुपवाडा जिल्ह्यातील आरामपोरा येथे मंगळवारी सुरक्षा दलाचे जवान आणि अतिरेक्यांमध्ये जबरदस्त चकमक उडाली. या हल्ल्यात लष्कराने चार दहशतवाद्यांना कंठस्नान घातले. त्यानंतरही लष्कराने सर्च ऑपरेशन सुरू ठेवले आणि आज पहाटे तीन दहशतवाद्यांना ठार केले.

कुपवाडामध्ये सुरक्षा दलाच्या जवानांनी अतिरेक्यांविरोधात मोहीम उघडली आहे. या मोहिमेचा एक भाग म्हणून आरामपोरा येथे सुरक्षा दलाचे काही जवान गस्तीवर होते, आज पहाटे गस्तीवर असलेल्या या जवानांना टार्गेट करत अतिरेक्यांनी त्यांच्यावर हल्ला चढविला. त्याला प्रत्युत्तर म्हणून जवानांनी गोळीबार केला असता त्यात तीन अतिरेकी ठार झाले, असं लष्कराच्या एका अधिकाऱ्याने सांगितलं.