वर्षाला १५ लाखांचा पगार असलेली नोकरी सोडून तरुणी होणार साध्वी

अहमदाबाद: वर्षाला १५ लाख रुपये पगार असलेली एक ३१ वर्षीय तरुणीची सध्या चर्चा सुरू आहे. दरमहा जवळपास सव्वा लाख रुपये पगार असलेली नोकरी सोडून या तरुणीने संन्यास दीक्षा घेतली आहे. ही तरूण सीए असून मुंबईतील एका फर्ममध्ये कार्यरत होती.

पायल शहा असे या तरुणीचे नाव आहे. मुंबईतील नरिमन पॉईंट येथील एका मोठ्या कंपनीत २०१४ साली पायलला नोकरी लागली. कठीण असणाऱ्या सीएच्या परिक्षेत अखिल भारतीय स्तरावर टॉप रँकिंगमध्ये असणाऱ्या पायलने जैन साध्वीची दीक्षा घेण्याचा निर्णय घेतला. आपल्या नवीन आयुष्यासाठी मानसिक तयारी करण्यासाठी पायल दररोज पाच किमीची अंतर चालत होती.

पुढील महिन्यात २४ फेब्रुवारी रोजी पायल शहा आपल्या या सध्याच्या आयुष्याचा त्याग करणार असून साध्वीची दीक्षा घेणार आहे. एका सोहळ्यात तिला साध्वीची दीक्षा दिली जाणार आहे. पायल ही दीक्षा घेणारी त्यांच्या घरातील पहिलीच व्यक्ती असणार आहे. पायलचे कुटुंबीय मूळचे गुजरातचे असून मुंबईत किचनवेअरचे एक दुकान आहे.

पायलने सांगितले की, माझा हा प्रवास सात वर्षापूर्वी सुरू झाला. माझ्या घराजवळ राहणाऱ्या जैन साध्वींच्या घरी जात असे. मला त्या आनंदी वाटायच्या. मोबाइल, सुट्टी नसतानाही त्या आनंदी होत्या. त्यानंतर मी त्यांच्यासोबत जवळपास वर्षभर राहिले. त्यानंतरच मी नवीन आयुष्याला सुरुवात करण्याचा निर्णय घेतला असल्याचे तिने सांगितले. गुरू महाराज परमलोचन श्रीजी यांच्यासोबत झालेल्या चर्चेने आयुष्याला कलाटणी मिळाली असल्याचे पायलने म्हटले.

पायलची लहान बहीण रीनानेदेखील एमबीए आणि सीएफए शिक्षण पूर्ण केले असून एका कंपनीत कार्यरत आहे. पायलने नोकरी सोडण्यासाठी राजीनामा दिल्यानंतर कंपनीने तिचा पगार वाढवण्याची तयारी दर्शवली. मात्र, पायल आपल्या निर्णयावर ठाम राहिली.