विकासदरात मोठी घसरण; गेल्या तिमाहीच्या तुलनेत ही वाढ निराशाजनक

नवी दिल्ली : भारताच्या आर्थिक विकासदरात चालू आर्थिक वर्षाच्या जुलै-सप्टेंबरच्या दुसऱ्या तिमाहीत रिझर्व्ह बँकेने अपेक्षेनुसार ६.३ टक्क्यांची वाढ नोंदवली आहे. आदल्या एप्रिल-जून तिमाहीच्या तुलनेत तसेच गेल्या वर्षीच्या २०२१-२२च्या दुसऱ्या तिमाहीच्या तुलनेत ही वाढ निराशाजनक ठरली आहे.

चालू आर्थिक वर्षाच्या एप्रिल-जूनच्या पहिल्या तिमाहीत आर्थिक विकासाचा दर १३.५ टक्के नोंदविला गेला होता. गेल्या वित्तीय वर्षाच्या सप्टेंबरअखेरच्या तिमाहीत हा दर ८.४ टक्के होता. सरकारने प्रसिद्ध केलेल्या आकडेवारीनुसार कोअर उद्योग क्षेत्रातील वाढ घटून ०.१ टक्के झाली आहे. गेल्या वर्षी याच महिन्यात कोअर उद्योग क्षेत्रातील वाढ ८.७ टक्के इतकी नोंदविण्यात आली होती. रिझर्व्ह बँकेने अलीकडेच प्रकाशित केलेल्या अहवालात दुसऱ्या तिमाहीत आर्थिक विकासदर ६.१ ते ६.३ टक्क्यांदरम्यान असेल, असा अंदाज वर्तवला होता. स्टेट बँक ऑफ इंडियाने आर्थिक विकासाचा दर ५.८ टक्के राहील, असे भाकित वर्तवले होते.

चालू वित्तीय वर्ष २०२२-२३च्या दुसऱ्या तिमाहीत उत्पादन क्षेत्रात ४.३ टक्के घट झाली आहे. गेल्या वर्षी याच तिमाहीत ही वाढ ५.६ टक्के इतकी होती. मात्र २०२१-२२च्या दुसऱ्या तिमाहीच्या ३.२ टक्के वाढीच्या तुलनेत कृषी क्षेत्रात ४.६ वृद्धीची नोंद झाली आहे. बांधकाम क्षेत्रातील वाढीचा दर ६.६ आहे. गेल्या वर्षी याच तिमाहीत तो ८.१ टक्के होता.

दरम्यान, एप्रिल-ऑक्टोबर या २०२२-२३च्या पहिल्या सहामाहीतील भारताची वित्तीय तूट ७ लाख ५८ हजार कोटी म्हणजे वार्षिक अंदाजाच्या ४५.६ टक्क्यांवर पोहोचली आहे. २०२२-२३च्या आर्थिक वर्षासाठी केंद्र सरकारने वित्तीय तुटीचे लक्ष्य ६.४ टक्के म्हणजे १६ लाख ६१ हजार कोटी रुपये इतके निर्धारित केले आहे. गेल्या वर्षी याच सहामाहीमध्ये वित्तीय तूट एकूण लक्ष्याच्या ३६.३ टक्के इतकी होती.