वृत्तसंस्था, चेन्नई
'करोना'चा फैलाव रोखण्यासाठी लागू करण्यात आलेले कलम १४४चे उल्लंघन केल्याबद्दल तमिळनाडूमध्ये पोलिसांनी १२०० जणांवर गुन्हे दाखल केले आहेत. याशिवाय अफवा पसरविल्याप्रकरणी गेल्या दोन दिवसांत १६ लोकांवर गुन्हे दाखल करण्यात आले आहेत.
विलगीकरणाचे नियम तोडणाऱ्यांवरही गुन्हे दाखल करण्यात आले आहेत, असे पोलिसांनी गुरुवारी सांगितले. चेन्नई पोलिसांनी दिलेल्या माहितीनुसार शहरात १५६ तपासणी नाके उभारण्यात आले असून, पोलिस कर्मचारी नियमित गस्तही घालत आहेत. लोकांना किराणा, भाजीपाला, औषधे खरेदी करण्यास परवानगी आहे. तमिळनाडूचे मुख्यमंत्री के. पलनीस्वामी यांनी विविध विभागांचे अधिकारी आणि जिल्हाधिकाऱ्यांची व्हिडिओ कॉन्फरन्सिंगद्वारे बैठक घेऊन उपाययोजनांचा आढावा घेतला. तमिळनाडूत २८ 'करोना'बाधित रुग्ण आढळले असून, ४५ वर्षीय रुग्णाला उपचारांनंतर बरे झाल्यावर घरी सोडण्यात आले आहे. तमिळनाडूत बुधवारी पहिल्या 'करोना'मृत्यूची नोंद झाली होती. मदुराई येथे बुधवारी ५४ वर्षीय 'करोना'बाधित रुग्णाचा मृत्यू झाला होता. दरम्यान, चेन्नई महापालिकेने झॉमॅटो, स्विगी यासारख्या फूड डिलिव्हरी कंपन्यांना घरपोच अन्न देण्यास परवानगी दिलेली नाही. मात्र, किराणा, भाजीपाला, धान्य आदी सामान स्थानिक सुपर मार्केट आणि ई-कॉमर्स कंपन्यांना घरपोच देण्यास परवागी देण्यात आली आहे.
...
मुजफ्फरनगरमध्ये ५० जणांवर गुन्हे
मुजफ्फरनगर : उत्तर प्रदेशातील मुजफ्फरनगर येथे लॉकडाउनचे नियम मोडल्याबद्दल ५० जणांवर गुन्हे दाखल करण्यात आले. बुधवारी दहा जणांवर गुन्हे दाखल करण्यात आले होते, असे वरिष्ठ पोलिस अधीक्षक अभिषेक यादव म्हणाले. जमावबंदीचे आदेश मोडणाऱ्यांविरोधात कडक कारवाई करण्यात येईल, असेही त्यांनी सांगितले. याशिवाय शहरात ८५५ वाहनधारकांना दंड आकारण्यात आला असून, ९७ वाहने जप्त केली असल्याचेही त्यांनी नमूद केले.
....
काँग्रेस आमदारावर गुन्हा
पुद्दुचेरी : जमावबंदीचे आदेश मोडल्याप्रकरणी पुद्दुचेरीतील सत्ताधारी काँग्रेसचे आमदार ए. जॉन कुमार यांच्याविरोधात गुन्हा दाखल करण्यात आला. पुद्दुचेरीच्या नायब राज्यपाल किरण बेदी यांनी गुरुवारी ही माहिती दिली. आमदार कुमार आणि इतर दोनशे जणांविरोधात हा गुन्हा दाखल करण्यात आला आहे. ओरलेनपेट पोलिसांनीही याला दुजोरा दिला आहे. आमदार कुमार यांनी त्यांच्या घराबाहेर भाज्यांचे वाटप केले होते. त्या वेळी मोठी गर्दी जमली होती. गस्तीवर असलेल्या पोलिसांना हा प्रकार समजला होता. भारतीय दंड संहितेच्या कलम २६९ आणि १८८ नुसार त्यांच्याविरोधात गुन्हा दाखल करण्यात आला आहे. साथरोग नियंत्रण कायदा, तसेच आपत्ती व्यवस्थापन कायद्यानुसारही हा गुन्हा दाखल करण्यात आला आहे. आमदार कुमार मुख्यमंत्री व्ही. नारायणसामी यांचे निकटवर्तीय मानले जातात.