४ वर्षाच्या अनन्याला दिला थेट '९वी' त प्रवेश!

ईशा जैन। लखनऊ

अनन्या वर्मा अजून पाच वर्षाची देखील नाही, पण तिच्या नावाची दखल मात्र लिमका बुक ऑफ रेकॉर्डने घेतली आहे. सोमवारी लखनऊमधील एका शाळेत तिला इयत्ता '९वी'च्या वर्गात प्रवेश देण्यात आला. ती आता ४ वर्ष ८ महिने आणि २१ दिवसांची आहे. ही चिमुकली दोन वर्षाच्या आत यूपी बोर्डाची परीक्षा देईल. तिला परिक्षेत यश लाभले तर ती आपली बहिण सुषमाचाही रेकॉर्ड मोडेल. सुषमाने २००७ मध्ये बोर्डाची परीक्षा दिली होती. तेव्हा ती अवघी ७ वर्षांची होती.

'अनन्या इतकी प्रभावशाली आहे की तिला इयत्ता '९वी' च्या वर्गात प्रवेश द्यावा लागला', असं जिल्हा विद्यालय निरीक्षक उमेश त्रिपाठी यांनी सांगितलं. दोघी बहिणींना सेंट मीरा इंटर कॉलेजमध्ये प्रवेश मिळाला आहे. बोर्डाची होम एज्युकेशनची परवानगी फक्त '८वी' इयत्तेपर्यंत आहे. अनन्या अस्खलित हिंदी बोलते व '९वी' ची पुस्तकही तिला वाचायला सोपी जातात आणि समजतातही. त्यामुळे तिला इयत्ता '९वी' त प्रवेश दिला गेला. १ डिसेंबर २०११ ला जन्मलेली अनन्या तेज बहादूर सिंग यांची मुलगी आहे. ते बाबासाहेब भीमराव आंबेडकर विश्वविद्यालय (बीबीएयू)त सहाय्यक निरीक्षक आहेत.

अनन्याच्या आईला तर लिहिता वाचताही येत नाही. तिचा भाऊ व बहिण दोघेही अतिशय हुशार आहेत. अनन्याचा मोठा भाऊ शैलेंद्र १४ वर्षाचा असतानाच त्याने बीसीए केले होते. तर १३ वर्षाची असतानाच सुषमाने बीएससी पूर्ण केले होते. सुषमाला बीबीएयूमध्ये पीएचडीसाठी प्रवेश मिळाला तेव्हा ती अवघी १५ वर्षांची होती. सर्वात लहान वयात बोर्डाची परीक्षा देणारी मुलगी म्हणून सुषमाचे नाव २००७ मध्ये लिमका बुक ऑफ रेकॉर्डमध्ये नोंदले गेले होते. “अनन्या एक वर्षाची असताना ती रामायण व सुंदरकांड वाचायची. मी कधीच माझ्या मुलांवर अभ्यासाच्या बाबतीत जबरदस्ती केली नाही. माझ्या कुटुंबावर देवाची कृपा आहे, मला अशी हुशार मुलं आहेत”, असं अनन्याचे वडील तेज बहादूर यांनी सांगितले.

मुख्याधापक अनीता रात्राही अनन्याची बुद्धिमत्ता पाहून आश्चर्यचकित आहेत. “अनन्या आमच्याकडे जूनमध्ये प्रवेश घ्यायला आली होती. तेव्हा तिने म्हटलेले की माझ्या ताईला म्हणजे सुषमाला इयत्ता '९वी' मध्ये प्रवेश मिळाला होता. मला '१०वी' मध्ये हवा आहे. मी तिला वर्तमानपत्र वाचायला सांगितले तेव्हा ती चांगल्या प्रकारे वाचत होती. तिची एखादी गोष्ट आत्मसात करण्याची क्षमता अद्भुत आहे. तसेच ती एकपाठी आहे”, असं रात्रा म्हणाल्या.