उंटांचे ४,००० दात, गायीची १३० कातडी जप्त!

मटा ऑनलाइन वृत्त । बंगळुरू

येथील केम्पेगौडा आंतरराष्ट्रीय विमानतळावर पाच प्रवाशांकडून उंटांचे ४००० दात आणि गायीची १३० कातडी जप्त करण्यात आली. या पाचपैकी एक महिला प्रवासी आहे. ते तस्करीसाठी हे प्राण्यांचे अवयव बँकॉकला नेण्याच्या तयारीत होते.

या सर्वांना कस्टम अधिकाऱ्यांनी ताब्यात घेतले असून ते सर्व प्राण्यांच्या अवयवांची तस्करी करणाऱ्या म्हैसूरच्या गँगचे सदस्य असल्याचे म्हटले जात आहे. बँकॉकला जाणाऱ्या थाय एअरवेजच्या विमानातून हे सर्वजण प्रवाश करण्याच्या तयारीत होते. त्यांच्याकडील बॅगांमध्ये प्लास्टिचे पॅकेट्स होते, त्याचा संशय आल्याने कस्टम अधिकाऱ्यांनी तपासणी केली.

उंटाचे प्रत्येकी १०० दात असलेल्या ४०० प्लास्टिक पिशव्या आणि गुंडाळून ठेवलेली गायीची १३० कातडी जप्त करण्यात आली. गोपी, त्याची पत्नी प्रिया गोपी, सिंकन्नी गोट्टी, चंद्रकांता आणि उदेश कुमार श्रीवास्तव अशी या पाच जणांची नावे असून सर्व म्हैसूरचे रहिवासी आहेत. म्हैसून आणि बंगळुरूहून आग्नेय आशियात प्राण्यांच्या अवयवांची तस्करी करणाऱ्या संघटित गँगमध्ये काम करत असल्याचे त्यांनी चौकशीत सांगितले. उंटाचे दात दागिन्यांमध्ये वापरले जातात तर गायीच्या कातड्यांना रंगवून ती वाघाची म्हणून विकली जातात अशी माहिती एका तपास अधिकाऱ्याने दिली.