आसामी गायिकेविरोधात ४६ मौलवींचा फतवा

मटा ऑनलाइन वृत्त । गुवाहाटी

'आकिरा' सिनेमात सोनाक्षी सिन्हाचा आवाज बनलेली व टीव्ही रिअॅलिटी शो गाजवून सर्वांचे लक्ष वेधून घेणारी १६ वर्षीय गायिका नाहिद आफ्रीन हिच्या विरोधात आसाममधील मौलवींनी फतवा काढला आहे. 'सार्वजनिक ठिकाणी गाणं बंद कर,' अशी धमकी तिला देण्यात आली आहे.

२०१५मध्ये झालेल्या एका टीव्ही रिअॅलिटी शोमध्ये नाहिदनं दुसरा क्रमांक पटकावला होता. टीव्हीवरील या यशानंतर नाहिदला अनेक ठिकाणांहून गाण्याची आमंत्रणं येत आहेत. येत्या २५ मार्च रोजी आसाममधील उदाली सोनई बिबी कॉलेजमध्ये संगीत रजनी होणार असून त्यातही नाहिद गाणार आहे. तत्पूर्वीच, तिच्या विरोधात फतवा काढण्यात आला आहे. मध्य आसाममधील होजई व नागांव जिल्ह्यांत ही 'फतवापत्रं' वाटण्यात आली असून त्यावर तब्बल ४६ मौलवींच्या नावासह सह्या आहेत. 'मुस्लिम तरुणींनी सार्वजनिक ठिकाणी गायन करणं शरियतच्या विरोधात आहे. मशिद, इदगाह, मदरसा आणि कब्रस्तानाच्या जवळपासच्या ठिकाणी गाण्यासारखे शरियतविरोधी कार्यक्रम झाल्यास मुस्लिमांच्या पुढील पिढ्यांवर अल्लाचा कोप होईल,' असं फतव्यात नमूद करण्यात आलं आहे.

पोलिसांनी तात्काळ याची दखल घेतली असून चौकशी सुरू केली आहे. दहशतवादाचा निषेध करण्यासाठी अलीकडंच झालेल्या एका कार्यक्रमात नाहिदनं गाणं गायलं होतं. तिच्या विरोधात काढण्यात आलेल्या फतव्यांशी त्या कार्यक्रमाचा काही संबंध आहे का, याचाही तपास केला जात आहे. नियोजित कार्यक्रमाला व नाहिदच्या कुटुंबीयाला पूर्ण संरक्षण देण्याचं आश्वासन पोलिसांनी दिलं आहे.

गाणं सोडणार नाही!

विश्वनाथ चरैली येथे राहणारी नाहिद सध्या दहावीत शिकते. तिच्या विरोधातील फतव्याबद्दल समजल्यानंतर तिला रडू कोसळलं. 'काय बोलावं हेच कळत नाही. संगीत ही मला देवाकडून मिळालेली देणगी आहे. त्यामुळं मी कुणाच्याही धमक्यांना घाबरणार नाही आणि गाणं सोडणार नाही,' असं तिचं म्हणणं आहे.