शबरीमला दर्शनासाठी ५०० महिलांची नोंदणी

वृत्तसंस्था, तिरुअनंतपुरम

शबरीमला येथील अयप्पा मंदिरात १७ नोव्हेंबरपासून सुरू होणाऱ्या मंडल-मक्करविलक्कू उत्सवासाठी १० ते ५० वयोगटातील सुमारे ५०० महिलांनी अय्यपास्वामींच्या दर्शनासाठी ऑनलाइन नोंदणी (ई-तिकीट) केली आहे. परंपरेनुसार या वयोगटातील महिलांना अयप्पा मंदिरात प्रवेश निषिद्ध होता; परंतु सर्वोच्च न्यायालयाने नुकत्याच दिलेल्या निर्णयानुसार सर्व वयोगटातील महिलांना दर्शन घेण्याचा अधिकार दिल्यानंतर महिलांनी ही नोंदणी केली आहे.

अय्यप्पा मंदिरातील उत्सवासाठी ३० ऑक्टोबरपासून ऑनलाइन नोंदणी सुरू असून, www.sabarimalaq.com या संकेतस्थळावर नोंदणी करण्यात येत आहे. १० ते ५० वयोगटातील ५३९ महिलांनी नोंदणी केली आहे. या वयोगटातील महिलांना मासिक पाळी येत असल्यामुळे त्यांना परंपरेनुसार दर्शनापासून दूर ठेवण्यात आले होते. परंतु न्यायालयाच्या निर्णयानुसार सर्व वयोगटातील महिलांना मंदिरात जाण्याची मुभा देण्यात आली आहे. त्यानुसार महिलांनी ही नोंदणी केली. यापूर्वीही महिलांनी मंदिरात दर्शनासाठी जाण्याचा प्रयत्न केला होता; परंतु त्यांना परंपरावाद्यांकडून रोखण्यात आले होते.

‘या संकेतस्थळावर अनेक महिलांची नावे दिसत असून, ती खरी आहेत की खोटी आहेत, हे माहिती नाही; परंतु महिलांनी या नोंदणी केल्याचे दिसून येत आहे. नोंदणीसाठी कोणतीही फी आकारण्यात आलेली नाही,’ अशी माहिती वरिष्ठ आयपीएस अधिकाऱ्यांनी दिली. ‘५३९ बुकिंग जरी झाले असले तरी केएसआरटीसी बस तिकिटांचे अद्यापही बुकिंग झालेले नाही,’ असेही अधिकाऱ्यांनी सांगितले.

शबरीमलामध्ये महिलांना प्रवेश मिळू नये यासाठी अय्यपा भक्तांचे अनेक दिवसांपासून आंदोलन सुरू आहे. महिलांना प्रवेशापासून रोखले जात आहे. सर्वोच्च न्यायालयाचा आदेश पाळू नये, असे आवाहनही केले जात आहे. मंदिर प्रवेशावरून विविध राजकीय पक्षांनीही आपली भूमिका मांडली असून, लोकभावनेचा आदर करायला हवा, असे मत भाजपचे अध्यक्ष अमित शहा यांनी व्यक्त केले होते, तर शबरीमलाचे आंदोलन भडकवण्यामागे राष्ट्रीय स्वयंसेवक संघाचा हात असल्याचा आरोप केरळ राज्य सरकार आणि काँग्रेसने केला होता.