यमुनाकिनारी कचरा फेकल्यास ५००० रुपये दंड

मटा ऑनलाइन वृत्त। नवी दिल्ली

यापुढे यमुना नदीकिनारी आणि आसपासच्या परिसरात कचरा फेकल्यास ५००० रुपये इतका दंड भरावा लागणार आहे. यमुना नदीत कचरा फेकणे आणि उघडयावर शौच करण्यावर राष्ट्रीय हरित न्यायाधिकरणाने (एनजीटी) आज बंदी घातल्याचे घोषित केले. हा नियम तोडणाऱ्यास ५ हजार रुपयांचा दंड पर्यावरण हानीबाबतच्या भरपाईच्या रुपात वसूल केला जावा असे आदेशच न्यायाधिकरणाने दिले आहेत.

यमुना नदीच्या सफाईच्या कामावर देखरेख ठेवण्यासाठी एनजीटीचे प्रमुख जस्टीस स्वतंत्र कुमार यांनी दिल्लीत बोर्डाच्या सीईओंच्या अध्यक्षतेखाली एक कमिटी स्थापन केली आहे. या समितीने वेळोवेळी आपला अहवाल सादर करावा अशा सूचनाही स्वतंत्र कुमार यांनी दिल्या आहेत. यमुना नदी प्रदूषित करणाऱ्या परिसरातील उद्योगांवर कठोर कारवाई करावी असे आदेशही एनजीटीने दिल्ली सरकार आणि पालिकांना दिले आहेत.

यमुनेतील सुमारे ६७ टक्के प्रदूषित पाणी तपासणीसाठी दिल्ली गेट आणि नजफगडमधील दोन जलशुद्धीकरण संयत्राकडे पाठवण्यात येणार आहेत. प्रदूषित पाणी स्वच्छ करण्यासाठी एकूण १४ जलशुद्धीकरण संयत्रांची व्यवस्था करण्यात येणार आहे. यांपैकी सात संयत्रांची जबाबदारी दिल्ली जल बोर्ड उचलणार आहे.