देशात आतापर्यंत ५४८ डॉक्टरांना करोनाची लागण

नवी दिल्ली : करोनाशी लढताना देशभरातील ५४८ डॉक्टर, परिचारिका आणि वैद्यकीय कर्मचाऱ्यांना करोनाची बाधा झाल्याची माहिती केंद्र सरकारच्या सूत्रांनी दिली. यात अन्य कर्मचारी, वॉर्ड बॉइज, स्वच्छता कामगार, सुरक्षा रक्षक, लॅब अटेंडंट, शिपाई, लाँड्री व किचन स्टाफचा समावेश नाही.

या डॉक्टर व परिचारिकांना याची लागण कुठून झाली याची माहिती उपलब्ध नसल्याने सूत्रांनी सांगितले. याचा तपास अद्याप करण्यात आलेला नसल्याने कामाच्या ठिकाणी किती जणांना लागण झाली आणि समूहातून कोणाला संसर्ग झाला आहे याची माहिती उपलब्ध नसल्याचेही सांगण्यात आले. अनेक डॉक्टरांचाही करोनामुळे मृत्यू झाला असून, त्याची निश्चित आकडेवारी उपलब्ध नसल्याचेही या सूत्रांनी सांगितले. राजधानी दिल्लीत ६९ डॉक्टरांना लागण झाली आहे. २७४ नर्सेस आणि वैद्यकीय कर्मचाऱ्यांना लागण झाली आहे.