उत्तर प्रदेशात ६२ टक्के मतदान

वृत्तसंस्था, लखनऊ

उत्तर प्रदेश विधानसभा निवडणुकीच्या तिसऱ्या टप्प्यात संध्याकाळी पाच वाजेपर्यंत सुमारे ६२ टक्के मतदान झाले. रविवारी झालेल्या या मतदानात ८२६ उमेदवारांचे भवितव्य मतपेटीत बंद झाले. तिसऱ्या टप्प्यात ६९ जागांवर मतदान झाले. गेल्या विधानसभेच्या तुलनेत यंदा अधिक मतदान झाले आहे.

येथे तर गुंडाराज

‘उत्तर प्रदेशमध्ये कायदा व सुव्यवस्था राखण्यात राज्य सरकारला पूर्णपणे अपयश आले आहे. येथे ‘गुंडाराज’ असून, मंत्र्याविरोधात गुन्हा दाखल करण्यासाठी सुप्रीम कोर्टाला आदेश द्यावे लागले; कारण येथील पोलिस स्टेशन हे समाजवादी पक्षाचे कार्यालय झाले आहेत,’ अशा शब्दांत पंतप्रधान नरेंद्र मोदी यांनी रविवारी समाजवादी पक्षावर हल्लाबोल केला. ते फतेहपूर येथील सभेत बोलत होते. ‘समाजवादी पक्ष आणि काँग्रेस यांची आघाडी म्हणजे समाजवादी नेते राममनोहर लोहिया यांचा अपमान आहे. तोंडात चांदीचा चमचा घेऊन जन्माला आलेल्यांना तळागाळात त्यांची ताकद राहिली नसल्याची जाणीव झाली आहे. त्यामुळेच, ‘२७ साल, यूपी बेहाल’ अशी घोषणा देणाऱ्यांनी समाजवादी पक्षाशी हातमिळवणी केली,’ अशा शब्दांत मोदी यांनी राहुल गांधी यांच्यावर नाव न घेता टीका केली.

‘अखिलेश मुख्यमंत्री होतील’ ‘समाजवादी पक्षात कोणतीही फूट नसून, भरपूर विकासकामे केलेली असल्याने अखिलेश पुन्हा एकदा मुख्यमंत्री होतील,’ असा विश्वास समाजवादी पक्षाचे मुलायमसिंग यादव यांनी व्यक्त केला. मुलायमसिंग प्रचारात सक्रिय का नव्हते, असे विचारले असता, ते म्हणाले, ‘मी प्रचार करतो आहे. मतदानाचे काही टप्पे अजून बाकी आहेत. त्यासाठी मी प्रचार करेन.’ शिवपाल यादव हे जसवंतनगरमधून मोठ्या मताधिक्याने विजयी होतील, असा विश्वासही त्यांनी व्यक्त केला.