'ब्ल्यू व्हेल'चे आतापर्यंत २०० बळी!

मटा ऑनलाइन वृत्त । नवी दिल्ली

'ब्ल्यू व्हेल गेम'मुळे आतापर्यंत २०० जणांनी आत्महत्या केली असून या गेमवर देशात पूर्णपणे बंदी घालण्यात यावी, अशी मागणी करणारी याचिका मदुराईतील एका ज्येष्ठ वकिलाने सुप्रीम कोर्टात दाखल केली आहे. या याचिकेवर १५ सप्टेंबर रोजी सुनावणी होणार आहे.

सरन्यायाधीश दीपक मिश्रा आणि न्यायमूर्ती ए. एम. खानविलकर यांच्या पीठाने ७३ वर्षीय वकील एन. एस. पोन्नय्या यांची याचिका आज दाखल करून घेतली आहे. ब्ल्यू व्हेल गेमवर बंदी घालण्याचे तसेच जनतेला जागरूक करण्यासाठी पावले उचलण्याचे निर्देश सुप्रीम कोर्टाने केंद्राला द्यावेत, अशी मागणी या याचिकेत करण्यात आली आहे.

५ सप्टेंबरपर्यंत मीडियात आलेल्या बातम्यांनुसार कमीत कमी २०० जणांनी हा ऑनलाइन गेम खेळताना आत्महत्या केलेल्या आहेत. यात बहुतांश १३, १४ आणि १५ वर्षे वयोगटातील मुले आहेत. मदुराई शहरातही कॉलेजच्या एका विद्यार्थ्याने आत्महत्या केल्याची नोंद पोलिसांकडे आहे, असे याचिकाकर्त्याने याचिकेत नमूद केले आहे.

दरम्यान, दिल्ली हायकोर्टाने फेसबुक, गुगल आणि याहूकडून यासंबधी दाखल याचिकेवर उत्तर मागितलेले आहे.