'अम्मां'च्या जागेवर ८२ उमेदवार!

मटा ऑनलाइन वृत्त । चेन्नई

तामिळनाडूच्या माजी मुख्यमंत्री जयललिता यांच्या निधनामुळे रिक्त झालेल्या विधानसभेच्या जागेवर येत्या १२ एप्रिलला पोटनिवडणूक होत आहे. पण या निवडणुकीसाठी एक नवी डोकेदुखी निवडणूक आयोगासमोर उभी राहिली आहे. आर.के. नगरच्या या एका जागेसाठी तब्बल ८२ उमेदवार रिंगणात आहेत. इव्हीएमवर जास्तीत जास्त ६३ उमेदवारांची नावे मावतात. यंत्रावरचा एक पर्याय 'नोटा'चा असतो. त्यामुळे छाननीनंतरही हे ढीगभर उमेदवार कायम राहिले तर इव्हीएमऐवजी मतपत्रिकांचा वापर या निवडणुकीसाठी करावा लागणार आहे.

पोल पॅनल वेबसाइटने दिलेल्या माहितीनुसार, या निवडणुकीसाठी सर्व प्रमुख पक्षांनी ११ डमी उमेदवार निवडणूक रिंगणात उतरवले आहेत. सोमवारी उमेदवारी मागे घेण्याच्या अखेरच्या दिवशी जरी या सर्वांनी उमेदवारी मागे घेतली, तरी ९ अतिरिक्त उमेदवार राहतात. जर हे ९ उमेदवार निवडणूक लढवणार असले तर मतदान इव्हीएमऐवजी मतपत्रिकेद्वारे होईल.

मतपत्रिकेद्वारे मतदान झाले तरी निवडणूक आयोगासमोरची समस्या सुटत नाही. कारण निवडणूक कर्मचाऱ्यांना M2 प्रकारचे इव्हीएम वापरण्याचे प्रशिक्षण दिले आहे. अत्याधुनिक M3 प्रकारच्या यंत्रांचेही प्रशिक्षण दिेलेले नाही. प्रमुख पक्षांच्या ७ उमेदवारांसह काही लहान पक्ष आणि ५७ अपक्ष उमेदवार या जागेवरून निवडणूक लढवत आहेत.