मालगाडी तिच्यावरून धडधडत जाऊनही ती वाचली!

मटा ऑनलाइन वृत्त । नवी दिल्ली

'काळ आला होता, पण वेळ आली नव्हती'... किंवा 'देव तारी त्याला कोण मारी'... या दोन म्हणींचा थरारक प्रत्यय घडवणारा एक व्हिडिओ सोशल मीडियावर व्हायरल झाला आहे. ४२ डब्यांची एक मालगाडी एका महिलेवरून धडधडत गेल्यानंतरही ती वाचल्याचा आश्चर्यकारक प्रकार भारतातल्याच कुठल्याशा स्टेशनवर घडलाय. त्याचा व्हिडिओ यू ट्युबवर ५५ लाख जणांनी पाहिलाय.

रेल्वे रूळ ओलांडण्याचे प्रकार आपल्यासाठी नवे नाहीत. हे जिवावर बेतू शकतं, असं कानी-कपाळी ओरडून सांगूनही कितीतरी महाभाग हा 'प्रताप' करताना दिसतात. या व्हिडिओमधील महिलाही रूळ ओलांडण्यासाठीच प्लॅटफॉर्मवरून उतरली होती. तितक्यात उजवीकडून मालगाडी येत असल्याचं तिनं पाहिलं. समोर काळ उभा असतानाही प्रसंगावधान राखून ती दोन रुळांच्या मधोमध पडून राहिली. हा प्रकार पाहून सगळ्यांच्याच काळजाचा ठोका चुकला. तिचं काय होणार, हे पाहण्यासाठी सगळेच पुढे सरसावले. अखेर ४२ वा डबा तिच्यावरून पुढे गेला आणि सगळ्यांनाच आश्चर्याचा सुखद धक्का बसला. ती महिला जिवंत होती, सुखरूप होती. लगेचच काही तरुण तिच्या मदतीला धावले आणि तिला प्लॅटफॉर्मवर घेऊन गेले.

अर्थात, हा सगळा प्रकार नेमका कुठे घडलाय, ती महिला कोण होती, ती धक्क्यातून सावरली का, हे कळू शकलेलं नाही. पण देशातील काही मोजक्या नशीबवान व्यक्तींमध्येच तिचा समावेश करावा लागेल.

जे घडलं ते तिच्याच चुकीमुळे घडलं होतं, हे खरंच आहे. पण, प्रसंगावधान आणि विधात्याच्या कृपेमुळे ती वाचली हा चमत्कारच म्हणावा लागेल. म्हणूनच, 'मारने वाले से बचाने वाला बडा होता है', हे व्हिडिओच्या शेवटी ऐकू येणारं एका महिलेचं वाक्य मनाला भिडतं.