चंडीगड : अभिनेते राहुल बोस यांनी मागवलेल्या दोन केळ्यांसाठी तब्बल ४४२ रुपये ५० पैसे आकारणाऱ्या चंडीगडच्या पंचतारांकित जेडब्ल्यू मेरियट हॉटेलला प्राप्तिकर खात्याने २५ हजार रुपये दंड ठोठावला आहे. बोस यांनी २२ जुलैला सोशल मीडियावर एक व्हिडीओ पोस्ट करून याची वाच्यता केली होती.
बोस यांचा व्हिडीओ व्हायरल झाल्यानंतर देशभरातून या हॉटेलवर टीका झाली होती. त्यावरून अनेक विनोदही व्हायरल झाले. शेवटी प्राप्तिकर खात्याने त्याची दखल घेऊन हॉटेलवर कारवाई केली. जीएसटीच्या ११व्या कलमाचे हॉटेलने उल्लंघन केले असून, केळ्यावर कर नसतानाही तो बिलात आकारला गेल्याने हा दंड करण्यात येत असल्याचे प्राप्तिकर खात्यातर्फे सांगण्यात आले.