वृत्तसंस्था, बेंगळुरू
येथील आंतरराष्ट्रीय विमानतळावर, शहराचे संस्थापक केम्पेगौडा यांचा भव्य पुतळा उभारण्याची घोषणा शुक्रवारी मुख्यमंत्री बी. एस. येडियुरप्पा यांनी केली. दरम्यान, कॉँग्रेसचे नेते डी. शिवकुमार यांच्या अटकेनंतर निदर्शने करणाऱ्या आणि राजकीयदृष्ट्या शक्तिशाली असलेल्या वक्कलिग समाजाला खूष करण्यासाठी हा निर्णय घेतल्याचे सूत्रांचे म्हणणे आहे.
येडियुरप्पा यांनी ट्विटच्या माध्यमातून भारतीय जनता पक्षाच्या सरकारने घेतलेल्या निर्णयाची माहिती दिली आहे. ते म्हणाले की, केम्पेगौडा विकास प्राधिकरणालाही १०० कोटी रुपयांचा निधी दिला जाणार आहे. केम्पेगौडा यांनी १५३७मध्ये बेंगळुरूची स्थापना केली होती. त्यांचा इतिहास आणि वारशाबद्दल पर्यटकांना माहिती देणारे केंद्र स्थापन केले जाईल. जुने म्हैसुरू आणि कर्नाटकच्या दक्षिण भागात वक्कलिग समाजाचे वर्चस्व आहे. कॉंग्रेसचे ज्येष्ठ नेते डी. के. शिवकुमार यांना अंमलबजावणी संचालनालयाने अटक केली आहे. त्याविरोधात समाजाने दोन दिवसांपूर्वी शक्तिप्रदर्शन केले होते. तत्कालीन कॉँग्रेस-जनता दल धर्मनिरपेक्ष आघाडी सरकारचे मुख्यमंत्री एच. डी. कुमारस्वामी हे याच समाजाचे आहेत. जनता दलाला या समाजाचा पाठिंबा आहे. भाजपने सरकार पाडल्याचा आरोप करीत समाजाने जाहीर भूमिका घेतली आहे. भाजपला प्रामुख्याने लिंगायत समाजाचा पाठिंबा असल्याचे सांगितले जाते. येडियुरप्पा हे लिंगायत आहेत.
\B
त्वरित सुनावणीचे आमदारांचे प्रयत्न
\B
राजकीय रणनीती ठरविण्यासाठी कर्नाटकातील अपात्र आमदारांनी शुक्रवारी बैठक घेतली. सर्वोच्च न्यायालयातील याचिकेवर लवकर सुनावणी घेण्यासाठी वकिलांमार्फत प्रयत्नशील करण्यासह सक्रीय राजकारणात परतण्याबाबतच्या विविध मुद्यांवर याप्रसंगी चर्चा करण्यात आली. कर्नाटक राज्य प्रदूषण नियंत्रण मंडळाचे अध्यक्ष डॉ. के. सुधाकर यांच्या निवासस्थानी आमदारांनी चर्चा केली. बैठकीस बी. सी. पाटील, एम. टी. बी. नागराज, मुनिरत्न, श्रीमंत पाटील, बायरथी बसवराज आदी उपस्थित होते. विधानसभेचे तत्कालीन सभापती के. आर. रमेश कुमार यांनी, कॉँग्रेसच्या १३, जनता दलाच्या (धर्मनिरपेक्ष) तीन आणि एका अपक्षांसह १७ आमदारांना पक्षविरोधी कारवाया केल्याने अपात्र ठरविले होते. सत्ताधारी पक्षाने त्या वेळी भारतीय जनता पक्षावर सरकार पाडण्याचे षडयंत्र रचल्याचा आरोप केला होता. अखेर एच. डी. देवेगौडा यांचे सरकार कोसळून भाजपने २९ जुलैला बी. एस. येडियुरप्पा यांच्या नेतृत्वाखाली नवे सरकार स्थापन केले. अपात्रतेबाबतचा निर्णय रद्द करण्याची विनंती संबंधित आमदारांनी सर्वोच्च न्यायालयात केली आहे. मात्र, घाई कशाची आहे, असा सवाल करून न्यायाधीशांनी अद्याप सुनावणीची तारीख जाहीर केलेली नाही.
शिवकुमार यांची कोठडी १७ पर्यंत वाढली
नवी दिल्ली : काँग्रेसचे ज्येष्ठ नेते डी. के. शिवकुमार यांची अंमलबजावणी संचलनालय (ईडी) कोठडीची मुदत १७ सप्टेंबरपर्यंत वाढविण्यात आली आहे. दिल्ली न्यायालयाने शुक्रवारी याबाबतचे आदेश दिले. विशेष न्यायाधीश अजयकुमार कुहार यांच्यापुढे याबाबतची सुनावणी झाली. 'ईडी'ने शिवकुमार यांच्या प्रकृतीची काळजी घ्यावी. औषधांबाबत प्राधान्य देत प्रश्न विचारावेत, असे निर्देश न्यायालयाने दिले.