अंत्यसंस्कारासाठी ‘आधार’ची मागणी

टाइम्स वृत्त, म्हैसुरू

हयातीत विविध कामांसाठी 'आधार' क्रमांकाची मागणी केली जात असतानाच, आता मृत्यूनंतरही 'आधार' पाठ सोडत नसल्याचे म्हैसुरू येथे समोर आले आहे. मरण पावलेल्या व्यक्तीवर अंत्यसंस्कार करण्यासाठी स्मशानभूमीच्या व्यवस्थापनाकडून मृताच्या, विशेषत: तरुण वयात मृत्यू झालेल्या व्यक्तींच्या आधार क्रमांकाची मागणी केली जात आहे. यामुळे म्हैसुरू महापालिकेला मृत्यूचे प्रमाणपत्र देण्याची प्रक्रिया जलद करता येईल, असा दावा स्मशानभूमींकडून केला जात असला, तरी आधीच प्रियजनांच्या मृत्यूच्या दु:खात असलेल्या नातेवाईकांची मात्र यामुळे धावपळ होत आहे.

अंत्यसंस्काराच्या वेळी आधार क्रमांकाची माहिती घेतल्यामुळे म्हैसुरू महापालिकेला मृत्यूचे प्रमाणपत्र लवकरात लवकर देता येईल, असे स्मशानभूमीतील कर्मचाऱ्यांनी सांगितले. तरुण वयात मरण पावलेल्या व्यक्तींबाबतच आधार क्रमांकाचा आग्रह धरला जात आहे. वयस्कर व्यक्तींच्या बाबतीत मात्र इतर कागदपत्रे पुरेशी आहेत, असेही त्यांनी स्पष्ट केले.

ही पद्धत गेल्या काही दिवसांतच सुरू झाल्याचे स्थानिकांनी सांगितले. 'माझ्या एका ६५ वर्षीय मित्राचे गेल्या आठवड्यात निधन झाले. तो अविवाहित होता. त्याची बहीण त्याच्यासोबत राहत होती. चामुंडी हिल्स येथील हिंदू स्मशानभूमीच्या कर्मचाऱ्यांनी तिला आधार कार्ड बंधनकारक असल्याचे सांगितले. सुदैवाने त्याचे आधार कार्ड होते,' असा अनुभव श्रीरामपुरा भागातील रहिवासी श्रीकांत भट यांनी सांगितला. असाच अनुभव इतर काही जणांना आला.

आयुक्त म्हणतात, सक्ती नाही

दरम्यान, म्हैसुरू महापालिकेचे आयुक्त जी. जगदीशा यांनी मात्र स्मशानभूमीत अंत्यसंस्कार करण्यासाठी मृताचा आधार क्रमांक बंधनकारक नसल्याचे स्पष्ट केले. जर कोणी आधार क्रमांकाची मागणी करत असेल, तर नातेवाईकांनी मला कळवावे. या प्रकरणी योग्य ती कारवाई सुरू केली जाईल, असेही जगदीशा यांनी स्पष्ट केले.