'आप'ला ITने बजावली ३० कोटींची नोटीस

मटा ऑनलाइन वृत्त । नवी दिल्ली

दिल्लीचे मुख्यमंत्री अरविंद केजरीवाल यांच्या आम आदमी पार्टीला आयकर विभागाने ३०.६७ कोटींची नोटीस बजावली आहे. 'आप'ने १३ कोटींच्या उत्पन्नाचा तपशील सादर केलेला नाही. तसंच ६ कोटी रुपयांची देणगी देणाऱ्या ४६२ जणांची पुरेशी माहिती न ठेवल्याने आयकर विभागाने पार्टीला फटकारले आहे.

आम आदमी पार्टीला देणगी दिलेल्या दात्यांची यादी टाइम्स नाउच्या हाती आली आहे. यादीनुसार देणगीदारांनी पार्टीला २० हजार कोटींपेक्षा जास्त रुपयांची देणगी दिल्याचं समोर आलं आहे. २०१४-१५ आणि २०१५-१६ दरम्यान पार्टीचे करपात्र उत्पन्न ६६.४४ कोटी रुपये आहे. याशिवाय पार्टीने १३ कोटी रुपयांच्या देणगीबाबत कुठलीही माहिती जाहीर केलेली नाही.

आयकर विभागाने बजावलेल्या नोटीसनंतर आम आदमी पार्टीतून या पूर्ण प्रक्रियेला सुरुंग लावण्याचा प्रयत्न केला जातोय. पार्टीला आपली बाजू मांडण्यासाठी ३० हून अधिक वेळा संधी देण्यात आली. तरीही पार्टीकडून कुठलेही उत्तर मिळाले नाही, असं समोर आलंय. पारदर्श आणि स्पष्टतेच्या अजेंड्यावर सत्तेत आलेली आम आदमी पार्टी आयकर विभागाच्या नोटीसमुळे गोत्यात येऊ शकते.