प्रदूषणावरील बैठकीला दांडी; गंभीरचा इंदूरमध्ये जिलेबीवर ताव

नवी दिल्ली: राजधानी दिल्लीतील प्रदूषणावर प्रचंड राजकारण सुरू असतानाच भाजपचे खासदार, माजी क्रिकेटपटू गौतम गंभीर यांच्यामुळे या वादात आणखी तेल ओतलं गेलं आहे. दिल्लीतील प्रदूषणावर उपाय शोधण्यासाठी आयोजित करण्यात आलेल्या बैठकीला खासदार गंभीर यांनी दांडी मारली. इंदूरमध्ये काही मित्रांसोबत जिलेबीवर ताव मारतानाचे गंभीर यांचे फोटो व्हायरल झाल्याने त्यांच्यावर आपने सडकून टीका केली आहे.

मुख्यमंत्री अरविंद केजरीवाल यांच्या नेतृत्वाखालील आम आदमी पार्टीने गौतम गंभीर यांचा जिलेबीवर ताव मारतानाचा फोटो त्यांच्या ट्विटर अकाउंटवर पोस्ट केला आहे. त्यावर आपने एक पोस्टही लिहिली आहे. दिल्ली प्रदूषणाने हैराण आहे आणि गौतम गंभीर इंदूरमध्ये मौजमजा करण्यात दंग आहेत. खासदाराने दिल्लीत येऊन प्रदूषणाच्या मुद्द्यावर होत असलेल्या बैठकीला यायला हवं होतं. या बैठकीला एमसीडी, डीडीए, पर्यावरण खात्याचे अधिकारी आणि दिल्लीचे खासदार गैरहजर राहिल्याने ही बैठक रद्द करण्यात आल्याचं आपने या ट्विटमध्ये म्हटलं आहे.


सोशल मीडियावर गौतम गंभीर यांना टीकेला सामोरे जावं लागत आहे. त्याने कुठल्या गोष्टीला प्राधान्य द्यावं यावरुन त्यांना झापलं जात आहे. दिल्लीमध्ये सत्तेत असलेली आम आदमी पक्षानेही त्यांच्यावर जोरदार टीका केली आहे. 'भाजपने प्रदूषणावर तोडगा काढण्यासाठी संसदेच्या स्थायी समितीची बैठक बोलावली. दिल्ली महानगरपालिका आयुक्त आणि दिल्ली विकास प्राधिकरणचे उपाध्यक्ष या बैठकीत आलेच नाहीत. तर खासदार गौतम गंभीर फक्त ट्विटरवर उपदेश देतात मात्र या बैठकीला तेही उपस्थित नव्हते', असं ट्वीट आपचे नेता सौरभ भारद्वाज यांनी केलं. या बैठकीला २९ जणांना आमंत्रित करण्यात आलं होतं. यावेळी समिती अध्यक्षा जगदंबिका पाल, हसनैन मसूदी, सी आर पाटील आणि संजय सिंह हे उपस्थित होते. मात्र, इतर समिती सदस्य आणि अधिकारी बैठकीला आलेच नाहीत.