कपिल मिश्रा 'आप'मधून निलंबित

मटा ऑनलाइन वृत्त । नवी दिल्ली

अरविंद केजरीवाल यांच्या मंत्रिमंडळातून डच्चू मिळाल्यानंतर आप आणि केजरीवाल यांच्यावर गंभीर आरोप करून खळबळ उडवून देणारे कपिल मिश्रा यांना पक्षातून निलंबित करण्यात आलं आहे. मिश्रा यांचं प्राथमिक सदस्यत्व पक्षाने रद्द केलं आहे. 'आप'च्या कार्यकारिणीची आज तातडीची बैठक झाली आणि या बैठकीत मिश्रा यांच्यावर कारवाई करण्याचा निर्णय घेण्यात आला.

कपिल मिश्रा यांना शनिवारी मंत्रिपदावरून हटवण्यात आले होते. खराब कामगिरीमुळे त्यांना डच्चू देण्यात आल्याचं कारण तेव्हा देण्यात आलं होतं. त्यानंतर मिश्रा यांनी थेट केजरीवाल यांच्यावर लाचखोरीचा आरोप केला होता. टँकर घोटाळ्यातील काही लोकांना वाचवण्यासाठी माझ्यावर कारवाई करण्यात आली, असा त्यांचा आरोप होता. त्यात आज मिश्रा यांनी पत्रकार परिषद घेऊन केजरीवाल आणि 'आप'वर आणखी गंभीर आरोप केले. केजरीवाल यांच्या मेहुण्यासाठी मंत्री सत्येंद्र जैन यांनी ५० कोटींचं जमिनीचं डील केलं, असा आरोप मिश्रा यांनी केला. त्याचवेळी जैन यांनी केजरीवाल यांना दोन कोटी रुपये दिल्याचं मी स्वत: पाहिलं आहे, या आरोपाचाही मिश्रा यांनी पुनरुच्चार केला. मिश्रा यांनी त्यांच्याकडे असलेले पुरावेही आज लाचलुचपत प्रतिबंधक विभागाकडे सोपविले. या सर्व घडामोडींनंतर मिश्रा यांच्यावर पक्षाकडून कारवाई केली जाईल, अशी शक्यता वर्तविली जात होती. ती शक्यता खरी ठरली आहे.

केजरीवाल यांना थेट लक्ष्य केल्याने मिश्रा यांच्यावर कारवाईचा बडगा उगारण्यात आला आहे. मिश्रा यांची पक्षातून हकालपट्टी न करता त्यांना निलंबित करण्यात आलं आहे. त्यामुळे ते पक्षाचे आमदार म्हणून कायम राहणार आहेत. त्यांच्यासाठी पक्षाचा व्हिप लागू असणार आहे.