‘काँग्रेससोबत दिल्लीत आघाडी शक्य नाही’

नवी दिल्ली:

'काँग्रेसने देशात इतरत्र आघाडी करण्यास नकार दिल्याने त्यांच्यासोबत फक्त दिल्लीमध्ये आघाडी करणे शक्य नाही', असे आम आदमी पक्षातर्फे (आप) शनिवारी पुन्हा एकदा सांगण्यात आले.

काँग्रेसने दिल्लीमध्ये ४:३ असा जागावाटपाचा प्रस्ताव 'आप'पुढे ठेवला आहे. त्यावर दिल्लीचे उपमुख्यमंत्री मनीष सिसोदिया म्हणाले की, काँग्रेससाठी दिल्लीत तीन जागा सोडणे म्हणजे 'तीन जागा भाजपला देणे' आहे. काँग्रेसने पहिल्यांदा हरियाणामध्ये ६:३:१ असा जागावाटपाचा प्रस्ताव दिला असल्याचेही सिसोदिया यांनी सांगितले. यामध्ये सहा जागा काँग्रेसला, तीन जागा जननायक जनता पक्षाला आणि एक जागा 'आप'ला असा प्रस्ताव आहे. 'आपण काँग्रेससोबत आघाडीचा निर्णय मोदी-शहा जोडगोळीला रोखण्यासाठी घेतला आहे', असेही ते म्हणाले.

'दिल्लीत काँग्रेसचे अस्तित्व शून्य आहे, तरीही त्यांना निम्म्या जागा हव्यात; तसेच काँग्रेसला आघाडी करायची असल्यास दिल्लीसह पंजाब आणि हरियाणामध्येही करायला हवी. पंजाबमध्ये आमचे २० आमदार आणि ४ खासदार आहेत, मग आमच्यासोबत आघाडी का होऊ शकत नाही', असा प्रश्नही सिसोदिया यांनी विचारला.