महिलेच्या दारात लघुशंका; 'एम्स'च्या संचालक मंडळावर नियुक्ती

चेन्नई : केंद्र सरकारकडून मदुराईच्या 'ऑल इंडिया इन्स्टिट्युट ऑफ मेडिकल सायन्सेस' अर्थात 'एम्स' च्या संचालक मंडळाची यादी जाहीर करण्यात आली आहे. या यादीनंतर एक नवा वाद समोर आला आहे. काही दिवसांपूर्वी एका महिलेच्या दारासमोर लघुशंका करणाऱ्या अखिल भारतीय विद्यार्थी परिषदेच्या एका व्यक्तीची या संचालक मंडळात नियुक्ती करण्यात आल्यानंतर हा वाद उभा राहिलाय.

पुदुच्चेरीच्या 'जवाहरलाल इन्स्टिट्युट ऑफ पोस्टग्रॅज्युएट मेडिकल एज्युकेशन अॅन्ड रिसर्च' (JIPMER) अध्यक्ष डॉ. व्ही एम कटोच यांची एम्सच्या अध्यक्षपदी निवड करण्यात आलीय. 'एम्स'च्या या संचालक मंडळात डॉ सुब्बैया शनमुगम, प्रोफेसर आणि प्रमुख (सर्जिकल ऑन्कोलॉजी विभाग) यांची नियुक्ती करण्यात आल्यानं अनेकांचं लक्ष इकडे वळलंय. अखिल भारतीय विद्यार्थी परिषद (ABVP) चे राष्ट्रीय अध्यक्ष असलेल्या डॉ. सुब्बैया यांच्यावर काही दिवसांपूर्वी चेन्नईमध्ये एका वयोवृद्ध महिलेच्या दारासमोर कचरा फेकण्यासाठी आणि लघुशंका करण्यासाठी गुन्हा दाखल करण्यात आला होता. या घटनेचा सीसीटीव्ही फुटेज आणि फोटोही सोशल मीडियावर व्हायरल झालेलं दिसलं होतं.


वाचा : शिक्षक-पालकांत अजूनही करोनाची धास्ती! शाळा बंदच राहणार
वाचा : अंबानींची Z+ सुरक्षा, सर्वोच्च न्यायालयानं फेटाळली याचिका

डीएमके खासदार कनिमोळी यांनी याचा विरोध करताना भाजपला लक्ष्य केलंय. 'अशोभनीय वर्तनाचं हे समर्थन आहे का? तसंच कार्यकर्त्यांना यांचे अनुकरण करण्यासाठी प्रोत्साहन दिलं जातंय का?' असा प्रश्न कनिमोळी यांनी उपस्थित केला आहे.


६२ वर्षीय वृद्ध महिलेच्या वतीनं तिच्या पुतण्यानं चेन्नई पोलिसांत तक्रार दाखल केली होती. काही दिवसांनी त्यानं ही तक्रार मागे घेताना 'प्रचंड दबावाचं' कारण दिलं होतं. उल्लेखनीय म्हणजे, अखिल भारतीय विद्यार्थी परिषद ही भाजपची विद्यार्थी संघटना आहे.

वृद्ध महिलेनं आपल्या तक्रारीत केलेल्या उल्लेखानुसार, तिनं १५०० रुपयांत आपला पार्किंग स्पेस डॉ. सुब्बैया यांना भाड्यानं दिला होता. जानेवारी महिन्यापासून जुलैपर्यंत सुब्बैया यांनी भाड्याचे पैसे भरले नव्हते. याच गोष्टीवरून दोघांचं भांडण झालं. त्यानंतर राग अनावर झाल्यानं डॉ. सुब्बैया यांनी महिलेच्या घराच्या दरवाजासमोर लघुशंका केल्याचं समोर आलं होतं. त्यानंतर डॉ. सुब्बैया यांच्याविरुद्ध भारतीय दंडविधानाच्या कलम २७१ आणि ४२७ नुसार तामिळनाडू महिला उत्पीडन कायद्यानुसार गुन्हा दाखल करण्यात आला होता.

यानंतर, महिलांचा छळ करणाऱ्यांना पाठिशी घालण्याची भाजपची संस्कृती असल्याचं सांगत विरोधी काँग्रेसनं जोरदार टीका केली होती. तसंच डॉ. सुब्बैया यांना पदावरून हटवण्याची मागणीही काँग्रेसनं केली होती.

वाचा : वादानंतर भाजपच्या जाहिरातींत पुन्हा अवतरले नितीश कुमार!
वाचा : Bihar Election: 'कमळा'च्या मास्कसहीत भाजप नेता मतदान केंद्रावर