माजी सनदी अधिकाऱ्याची मुलासह आत्महत्या

मटा ऑनलाइन वृत्त । नवी दिल्ली

भ्रष्टाचाराच्या आरोपाखाली जुलै महिन्यात अटक करण्यात आलेले माजी सनदी अधिकारी बी. के. बन्सल यांनी स्वत:च्या २५ वर्षांच्या मुलासह दिल्लीतील राहत्या घरी आत्महत्या केली आहे. बन्सल यांची पत्नी व मुलीनं जुलै महिन्यातच गळफास लावून आत्महत्या केली होती. मायलेकीनंतर अवघ्या दोन महिन्यांत बापलेकानंही स्वत:ला संपवल्यानं खळबळ उडाली आहे.

बी. के. बन्सल हे कंपनी व्यवहार खात्यात महासंचालक पदावर होते. मुंबईतील एका औषध कंपनीच्या बेकायदेशीर उद्योगांवर पांघरूण घालण्यासाठी २० लाख रुपये मागितल्याचा व ९ लाख रुपयांची लाच स्वीकारल्याचा आरोप बन्सल यांच्यावर होता. या प्रकरणी त्यांना १६ जुलै रोजी अटक करण्यात आली होती. अटकेनंतर सीबीआयनं टाकलेल्या छाप्यात बन्सल यांच्या घरातून ६० लाख रुपयांची रोकड, २० मालमत्ता आणि ६० बँक खात्याची कागदपत्रं जप्त करण्यात आली होती.

बन्सल यांच्या अटकेनंतर दोनच दिवसांनी त्यांची पत्नी सत्यबला (५८) व मुलगी नेहा (२७) या दोघींनी गळफास घेऊन आत्महत्या केली होती. मानहानीमुळं आम्ही हा निर्णय घेतल्याचं त्यांनी सुसाइड नोटमध्ये म्हटलं होतं. आता बन्सल व त्यांच्या मुलाच्या आत्महत्येमुळं या प्रकरणाचं गूढ वाढलं आहे.