'भारत जोडो'मध्ये पाकिस्तान झिंदाबादच्या घोषणा दिल्याचा आरोप; व्हिडिओसंदर्भात मध्य प्रदेशात गुन्हा

खरगोन : काँग्रेसच्या ‘भारत जोडो’ यात्रेदरम्यान पाकिस्तानसमर्थक घोषणा दिल्याचा आरोप झाल्यानंतर राजकीय वर्तुळात खळबळ उडाली होती. या संबंधी एका व्हिडिओसंदर्भात मध्य प्रदेश पोलिसांनी गुन्हा दाखल केला आहे.

या प्रकरणी अज्ञात व्यक्तींविरोधात भारतीय दंडसंहिता कलम १५३ (ब) आणि १८८ अन्वये गुन्हा दाखल करण्यात आल्याचे खरगोनचे पोलिस अधीक्षक धर्मवीरसिंह यादव यांनी रविवारी सांगितले. या प्रकरणी पुढील तपास सुरू असल्याने त्यांनी आणखी माहिती देण्यास नकार दिला. हा व्हिडिओ राज्य काँग्रेसच्या ट्विटर हँडलवरून २५ नोव्हेंबर रोजी सकाळी आठ वाजून ५२ मिनिटांनी प्रसृत करण्यात आला आणि पाकिस्तानसमर्थक घोषणा ऐकल्यानंतर तो काढून टाकण्यात आला, असा दावा मध्य प्रदेश भाजपचे प्रवक्ते पंकज चतुर्वेदी यांनी केला आहे.

या आधीही भारत जोडो यात्रेदरम्यान एका व्हिडिओत पाकिस्तानसमर्थक घोषणा दिल्याचा आरोप झाला होता. हा व्हिडिओ समाजमाध्यमावर टाकल्याप्रकरणी छत्तीसगड पोलिसांनी एकावर गुन्हा दाखल केला आहे. ही व्यक्ती मध्य प्रदेशमधील आहे.

काँग्रेस म्हणतो, ‘व्हिडिओ बनावट’

हा व्हिडिओ बनावट असल्याचे काँग्रेसने म्हटले आहे. व्हिडिओत फेरफार करून भाजप राहुल गांधी यांच्या पदयात्रेला बदनाम करण्याचा प्रयत्न करत असल्याचा आरोप मध्य प्रदेश काँग्रेस समितीच्या प्रसारमाध्यम विभागाचे अध्यक्ष के. के. मिश्रा यांनी केला. हा व्हिडि भाजपचे प्रसारमाध्यम प्रमुख लोकेन्द्र पराशर यांनी हा ट्विटरवर शेअर केला होता. त्यामुळे त्यांच्याविरोधात कायदेशीर कारवाई केली जाईल, असेही मिश्रा म्हणाले.