आई-वडिलांना सांभाळा अन्यथा कायदेशीर कारवाई

मणिपूर

'ज्यांनी जन्म दिला, लहानाचे मोठे केले, शिक्षण देऊन अधिकारी बनवले अशा आई आणि वडील यांचा म्हातारपणी सांभाळ करा अन्यथा संबंधित अधिकाऱ्यांवर कायदेशीर कारवाई करण्यात येईल', असा इशारा मणिपूरचे मुख्यमंत्री एन. बीरेन सिंह यांनी राज्यातील अधिकाऱ्यांना दिला आहे.

आंतरराष्ट्रीय वृद्ध दिवसानिमित्त आयोजित करण्यात आलेल्या एका कार्यक्रमात बोलताना त्यांनी अधिकाऱ्यांना चांगलेच सुनावले. कोणतीही व्यक्ती आई-वडिलांच्या आशीर्वादाशिवाय यशस्वी होऊ शकत नाही. आज असंख्य जण आई-वडिलांचा सांभाळ करण्यासाठी टाळाटाळ करीत आहेत. मुले सांभाळ करीत नसल्याच्या अनेक तक्रारी माझ्याकडे आज त्यांची वृद्ध आई-वडील घेवून आले आहेत, असेही मुख्यमंत्र्यांनी यावेळी सांगितले.

जे लोक आपल्या जन्मदात्या आई-वडिलांशी गैरवर्तणूक करतात किंवा त्यांचा सांभाळ करीत नाहीत. ते लोक जीवनात कधीच यशस्वी होत नाहीत. उलट ज्या घरात आई-वडील राहतात त्या घरातील व्यक्ती जीवनात यशस्वी होतात. जर राज्यातील कोणत्याही सरकारी अधिकारी किंवा कर्मचाऱ्यांनी आपल्या आई-वडिलांचा सांभाळ करण्यास नकार दिला तर त्या अधिकाऱ्यांविरुद्ध राज्य सरकार कायदेशीर कारवाई करणार असल्याचे मुख्यमंत्री म्हणाले.